Плаціць за праезд у наземным транспарце Мінска можна будзе карткай любога банка
Пра тэрміны ўкаранення новай сістэмы аплаты праезду скажуць пазней.
Плаціць за праезд у наземным транспарце Мінска можна будзе карткай любога банка — па аналогіі з метрапалітэнам. Пра гэта распавёў першы намеснік старшыні Мінгарвыканкама Аляксандр Камендант, паведамляюць Мінск-навіны.
Ён адзначыў, што пра тэрміны ўкаранення новай сістэмы аплаты праезду мінчан праінфармуюць дадаткова. Акрамя таго, пасля яе запуску будзе прадугледжаны пераходны перыяд, каб кожны пасажыр мог выбраць найбольш зручны для яго спосаб аплаты.
— Мы апрабавалі гэтую сістэму на асобных маршрутах, сумесна з Міністэрствам транспарту і Міністэрствам сувязі аналізуем патэнцыйных пастаўшчыкоў саміх валідатараў і праграмнага забеспячэння да іх. Працаваць будуць карткі ўсіх банкаў — гэта ўніфікаваны сродак, прыкладна такі ж, як у метро, дзе мы можам выкарыстоўваць адзіны праязны альбо банкаўскую картку, — пракаментаваў першы намеснік старшыні Мінгарвыканкама.
Зараз захоўваюцца ўсе звыклыя спосабы аплаты праезду: талоны можна набыць у кіроўцы, у кіёсках «Мінсктранс», касах метрапалітэна і сетцы «Табакерка».
Цяпер чытаюць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку43
Каментары