16 верасня ў Міністэрства замежных спраў Літвы выклікалі прадстаўніка пасольства Беларусі ў Літве і ўручылі яму ноту рашучага пратэсту ў сувязі з парушэннем дзяржаўнай мяжы і паветранай прасторы Літвы.
У ноце адзначаецца, што ў ноч з 14 на 15 верасня 2026 года сродкамі аб'ектыўнага кантролю быў зафіксаваны беспілотны лятальны апарат, які з боку Беларусі парушыў дзяржаўную мяжу і паветраную прастору Літвы.
Літоўскае МЗС расцэньвае гэты інцыдэнт як грубае парушэнне міжнароднага права і патрабуе ад Беларусі неадкладна даць падрабязнае тлумачэнне таго, што адбылося, а таксама не дапусціць падобных парушэнняў у будучыні.
Літва таксама патрабуе, каб Беларусь забяспечыла эфектыўны кантроль над сваёй тэрыторыяй і паветранай прасторай і не дапускала дзеянняў, якія могуць ствараць пагрозу бяспецы суседніх дзяржаў.
У МЗС Літвы падкрэслілі, што краіна пакідае за сабой права разам з саюзнікамі прыняць усе неабходныя меры для гарантавання нацыянальнай бяспекі, тэрытарыяльнай цэласнасці і бяспекі насельніцтва.
Уночы 15 верасня літоўскія вайскоўцы выявілі аб’ект, які ўвайшоў у паветраную прастору Літвы. Яго збілі італьянскія знішчальнікі НАТА.
Пазней літоўскія ўлады заявілі, што збіты беспілотнік нёс выбухоўку. У Міністэрстве абароны Літвы адзначылі, што гэта быў першы такі выпадак парушэння паветранай прасторы краіны.
15 верасня дарадца прэзідэнта Літвы Дэйвідас Матулёніс заявіў, што з Мінска Вільню не папярэджвалі пра гэты беспілотнік. На наступны дзень прэзідэнт Літвы Гітанас Наўседа паведаміў, што збіты аб’ект быў беспілотнікам расійскай вытворчасці тыпу «Гербера».
Цяпер чытаюць
Трагедыя з 30‑гадовай доктаркай са Старобіна — пайшла выдаляць зуб мудрасці і памерла20
Каментары