Кушнер Пуціну: Вы нам і год назад казалі, што за пару месяцаў зоймеце Данбас
Зяць прэзідэнта ЗША Джарэд Кушнер падчас перамоваў у Крамлі паставіў пад сумнеў заяву Уладзіміра Пуціна аб хуткім захопе Расіяй усяго Данбаса. Пра з'едлівую рэпліку Кушнера паведаміла The New York Times.
Сустрэча Пуціна з прадстаўнікамі Дональда Трампа Джарэдам Кушнерам і Стывам Уіткафам адбылася ў Крамлі 5 верасня. Як піша The New York Times, падчас перамоваў Пуцін дэманстраваў упэўненасць. Ён заявіў амерыканцам, што на працягу некалькіх месяцаў расійскія войскі нарэшце возьмуць пад кантроль увесь Данбас.
Пуцін таксама заявіў, што Расія гатовая нанесці маштабныя ўдары па энергасістэме Украіны, што можа зрабіць будучую зіму асабліва цяжкай для ўкраінцаў.
Кушнер паспрабаваў запярэчыць Пуціну.
«Пры ўсёй павазе, вы казалі нам дакладна тое самае год таму. Якая імавернасць таго, што мы вернемся сюды яшчэ праз год, а вы зноў будзеце казаць тое самае? Можа, не будзем губляць год?»
Гэты абмен рэплікамі The New York Times апісалі чалавек, знаёмы з ходам перамоваў, і амерыканскі чыноўнік. Выданне адзначае, што ён добра ілюструе дылему, з якой сутыкнуліся намаганні Трампа пакласці канец вайне ва Украіне, якія працягваюцца ўжо больш за 18 месяцаў.
Адным з ключавых пытанняў на перамовах застаецца Данбас. NYT адзначае, што стала зразумела: Украіна не збіраецца выводзіць войскі з той часткі сваёй тэрыторыі, якую Пуцін патрабуе.
Пазней Кушнер публічна расказаў пра гэтую праблему падчас выступу па відэасувязі на сустрэчы міжнародных прыхільнікаў Украіны ў Кіеве.
«Прэзідэнт Пуцін акрэсліў лінію, якой ён хоча дасягнуць, — сказаў Кушнер. — Калі б Украіна хацела адысці да гэтай лініі, тады, відавочна, астатняя частка пагаднення ў нас ужо падрыхтаваная. Але Украіна цяпер не хоча гэтага рабіць».
На гэтым фоне адміністрацыя Трампа шукае новыя спосабы заахвоціць Расію да заканчэння вайны. Паводле NYT, Белы дом цяпер разглядае магчымасць заключэння бізнес-здзелак з Расіяй яшчэ да спынення баявых дзеянняў. Гэта было б зменай у параўнанні з ранейшай пазіцыяй Трампа, які заяўляў, што бізнес з Расіяй будзе магчымы пасля ўрэгулявання вайны.
Адначасова Кангрэс ЗША прыняў законапраект, накіраваны супраць расійскага энергетычнага сектара. Ён дазваляе прэзідэнту ўводзіць тарыфы да 100 працэнтаў супраць краін, якія купляюць найбольш расійскай нафты або газу, а таксама прадугледжвае санкцыі супраць расійскіх чыноўнікаў, бізнесменаў і фінансавых устаноў. Трамп даў зразумець, што падпіша законапраект.
Паездка Кушнера і Уіткафа ў Маскву, а затым у Кіеў стала спробай аднавіць перамовы, якія раней у гэтым годзе ў значнай ступені спыніліся. Паводле ўкраінскіх чыноўнікаў, трохбаковыя перамовы ЗША, Украіны і Расіі могуць аднавіцца ў кастрычніку. На іх, як чакаецца, можа абмяркоўвацца абмежаванае спыненне агню — у прыватнасці, спыненне ўдараў па энергетычнай інфраструктуры або суднаходстве ў Чорным моры.
Вінакурню Любанскага ў Мінску закрыў сакрэтны гмах, дзе запраектаваныя кабінеты для допытаў і памяшканне для спальвання дакументаў9
Вінакурню Любанскага ў Мінску закрыў сакрэтны гмах, дзе запраектаваныя кабінеты для допытаў і памяшканне для спальвання дакументаў
Беларус-вахтавік на Ямале стварае песні на беларускай мове з дапамогай ШІ. «Раней музыка была закрытым клубам. Нейрасеткі адчынілі гэтыя дзверы з нагі»1919
Каментары