Латушка: Ідзе пяць крымінальных справаў, звязаных з пагрозай майму жыццю і здароўю
Паводле кіраўніка Народнага антыкрызіснага ўпраўлення, беларускія спецслужбы спрабуюць атрымліваць інфармацыю пра яго атачэнне і перамяшчэнні.
У інтэрв'ю Паўла Латушкі Беларускай службе Польскага радыё гаворка сярод іншага зайшла пра тое, што ў дэмакратычных структурах выяўляюць людзей, звязаных са спецслужбамі.
Латушка ў размове з Аксанай Колб заўважыў, што цалкам засцерагчыся ад такіх выпадкаў не могуць нават дзяржавы з уласнай контрвыведкай. Ён прывёў у прыклад Польшчу і суддзю Томаша Шміта, які меў доступ да дзяржаўных сакрэтаў, а пасля з'ехаў у Беларусь.
«Крытыкаваць можна колькі заўгодна. Гэта самае лёгкае, што можна зрабіць. Але калі прааналізаваць аргументы, то аргументы павінны быць наступныя. Дэмакратычныя сілы Беларусі не маюць контрвыведкі, і не таму, што не хочуць. Яны не маюць права мець яе ў краінах, у якіх знаходзяцца. Калі мы створым з вамі тут контрвыведку, мы адразу парушым заканадаўства гэтай краіны», — давёў Латушка.
Паводле палітыка, толькі за апошні месяц у яго камандзе і фракцыі ў Каардынацыйнай радзе зафіксавалі 11 новых спробаў вярбоўкі.
«Апошнія спробы вярбоўкі — просьба за грошы перадаваць інфармацыю пра тое, які мой графік, куды я езджу, чым я займаюся.
Гэта сістэмная [праца]. Ідзе пяць крымінальных спраў, звязаных з пагрозай майму жыццю і здароўю.
Напрыклад, два тыдні таму раённы суд Варшавы завёў чарговую крымінальную справу па факце пагрозы майму жыццю, даў даручэнне пракурору расследаваць гэтае злачынства», — падзяліўся падрабязнасцямі Латушка.
Па словах Латушкі, супраць беларускіх дэмакратычных структур працуюць КДБ, разведвальныя структуры МУС і ваенная разведка. Самі дэмакратычныя сілы, паводле яго, могуць разлічваць перадусім на праваахоўныя органы краін, у якіх знаходзяцца.
«Калі адбываюцца такія сітуацыі як знікненне людзей, што я рабіў першае? Я адразу інфармаваў пракурора і паліцыю. Калі спрабуюць вербаваць супрацоўнікаў, я адразу паінфармаваў ваеннага пракурора Акруговай пракуратуры Варшавы».
Палітык заклікаў паведамляць пра выпадкі вярбоўкі не толькі праваабаронцам, але і мясцовым праваахоўным органам. На яго думку, дзейнасць беларускіх спецслужбаў супраць беларусаў за мяжой трэба разглядаць і як праблему бяспекі краін, у якіх яны жывуць.
Стопрацэнтнай бяспекі, паводле Латушкі, не можа гарантаваць нават дзяржава. Таму застаецца ўзмацняць уласныя меры засцярогі.
«Я кажу — маё жыццё за зачыненымі дзвярыма. То-бок я заўсёды зачыняю дзверы. Не тое, што за сабой, калі выходжу. Гэта жыццё пад камерамі. Гэта значыць, трэба прымяняць тыя сродкі, якія дапамагаюць кантраляваць прастору, у якой ты знаходзішся. Ты не можаш піць ваду, калі табе хтосьці адкрые бутэльку. Лепш адкрыць яе самому. То-бок прымяняць меры самабяспекі. Гэта таксама важна».
Латушка таксама заклікаў асцярожна ставіцца да незнаёмцаў, якія выходзяць на сувязь і прадстаўляюцца супрацоўнікамі ўкраінскіх спецслужбаў. Паводле яго, апошнім часам такія выпадкі сталі частымі. Ён падкрэсліў, што кантакты з замежнымі спецслужбамі з'яўляюцца парушэннем заканадаўства краіны знаходжання.
Для праверкі людзей, якія выклікаюць падазрэнні, дэмакратычныя структуры, паводле Латушкі, могуць звяртацца па дапамогу да «Белпол».
Каментары