Расія пачала абмяркоўваць размяшчэнне дата-цэнтраў для ШІ ў «дружалюбных» краінах
Кіраўнік Беларускай асацыяцыі высокіх тэхналогій і лічбавай інфраструктуры Аляксей Свянціцкі ўжо прапанаваў расійскім кампаніям будаваць такія цэнтры ў краіне.
Урад Расіі прапрацоўвае магчымасць стварэння дата-цэнтраў (цэнтры апрацоўкі даных — ЦАД) для штучнага інтэлекту (ШІ) на тэрыторыі «дружалюбных» краін, у прыватнасці Беларусі і Казахстана. Пра гэта піша РБК са спасылкай на крыніцы ў ІТ-галіне. У Мінлічбы пацвердзілі, што разглядаюцца розныя варыянты размяшчэння дата-цэнтраў, але канкрэтных рашэнняў пакуль няма.
Адна з прычын — дэфіцыт вылічальных магутнасцяў у Расіі. У Маскве свабоднымі застаюцца каля 50 МВт, чаго хопіць на два—чатыры буйныя камерцыйныя ЦАД. Пры гэтым на маскоўскі рэгіён прыпадае больш за 75% камерцыйных магутнасцяў, а да 2032—2033 гадоў краіне спатрэбіцца дадаткова ўвесці 2,5—3 ГВт магутнасцяў. Акрамя таго, стойка з абсталяваннем для ШІ спажывае да 40 кВт, тады як звычайная — 5—10 кВт.
Кіраўнік Беларускай асацыяцыі высокіх тэхналогій і лічбавай інфраструктуры Аляксей Свянціцкі ўжо прапанаваў расійскім кампаніям будаваць ЦАД у краіне. Ён паведаміў, што вядзе перамовы на гэты конт з прэзідэнтам расійскай Асацыяцыі ўдзельнікаў галіны ЦАД Ігарам Дарафеевым.
Сярод магчымых праектаў — дата-цэнтр «Масква — Мінск» на мяжы дзвюх краін.
Адной з пераваг Беларусі называюць прафіцыт электраэнергіі. Прэм'ер-міністр Раман Галоўчанка ў сакавіку казаў, што краіна гатовая прапанаваць інвестарам і партнёрам выгадныя ўмовы ў сферы дата-цэнтраў.
Казахстан тым часам развівае праект «Даліна ЦАД» у Экібастузе. Яго магутнасць павінна скласці 300 МВт з магчымасцю павелічэння да 1 ГВт, а аб'ём інвестыцый ацэньваецца прыкладна ў $10 млрд. Пагадненні аб супрацоўніцтве заключаныя з Firebird і Nvidia, запуск запланаваны на 2027 год.
Каментары
А расіяне будуць прыязжаць па выяздной візе, каб карыстацца, 2 раза на год - на навагоднія і майскія святы.