У нядзелю, 12 лістапада, 11-я сталічная спартшкола ўмясьціла ці ня ўвесь шашачны бамонд Меншчыны.
У нядзелю, 12 лістапада, 11-я сталічная спартшкола ўмясьціла ці ня ўвесь шашачны бамонд Меншчыны. Сорак восем удзельнікаў змагаліся за прызы «Нашай Нівы» і мар’інагорскага клюбу «Дэбют». Летась шэф «Дэбюту», майстар спорту Канстанцін Балахоўскі прапанаваў Рэдакцыі «НН» наладзіць да юбілею шашачны фэст. І вось фэст адбыўся, прыцягнуўшы ўвагу такіх мэтраў, як Кірыла Хайнюк, Аркадзь Плакхін і Юры Файнберг. Менавіта яны па выніках дзевяці тураў выявіліся прызэрамі шашачнага турніру «Нашай Ніве» – сто гадоў». Побач з гросмайстрам Плакхіным гулялі і тыя, хто толькі-толькі засвоіў «трохкутнік Пятрова».
Гульцоў прывітаў намесьнік галоўнага рэдактара «НН» Андрэй Скурко, а віцэ-чэмпіён сьвету па рускіх шашках Андрэй Валюк завітаў у залю, каб паглядзець на баталіі лідэраў. Дзякуючы галоўнаму судзьдзю Аляксандру Паўловічу і яго памочніцам Вікці ды Сьвятлане імпрэза прайшла без канфліктаў. На закрыцьці трое прызэраў атрымалі мэдалі, дзесяцёра пераможцаў – дыплёмы й памятныя блакноты для запісу партыяў, а 7-гадовы Валерка Разаеў і 70-гадовы Юры Файнберг – сувэніры з сымболікай «НН». Такі сувэнір займеў і аўтар найлепшай камбінацыі, кандыдат у майстры спорту Дзьмітры Фадзееў. На нашых вачах бліскуча перамог суперніка іншы КМС, барысаўчанін Пётр Аляхно, ды ён чамусьці не пажадаў канкураваць з Фадзеевым.
Сын Канстанціна Балахоўскага Віктар у табліцы на крок апярэдзіў бацьку. «Дома я з табою разьбяруся!», – пажартаваў той, пакідаючы сцэну. Цікава, што падчас лёсаваньня сп. Канстанцін прысвоіў гульцам нумары, якія адпавядалі гадам выданьня «НН». Найлепшыя паказьнікі – у «1913», «1991» і «1995».
Былы прызэр першынства сьвету сярод падлеткаў П. трохі пабурчэў у калідоры: «От, сабраўся склад, як у Чэмпіянаце Беларусі!». Сам ён трапіў адно ў «дваццатку». Аднак бальшыня гульцоў не брала да галавы занятых месцаў. Для аматараў турнір стаўся добрай навукай, нагодай для сустрэчы з таварышамі, а сёй-той упершыню даведаўся, чым ёсьць нашая газэта. І ўсе былі ўдзячныя гаспадарам пляцоўкі, адміністрацыі СДЮШАР-11, за прасторную залю, на колькі гадзін саступленую ў распараджэньне шашыстаў.
□
Фоты глядзеце ў блогу Юліі Дарашкевіч.
Былога вайскоўца з Брэста, які вярнуўся з Польшчы, абвінавацілі ў «тэрарызме» і адправілі ў калонію6
Каментары