Скандал вакол фільма «Малакасосы» праз сэксуальныя сцэны з непаўналетнімі

Прэм’ера амерыканскага рэмейку серыяла «Малакасосы» пагражае выліцца ў цэнзурны скандал — праз паказ адкрытых сцэн з удзелам няпоўнагадовых ад падтрымкі шоу адмаўляюцца спонсары, а праваабаронцы пагражаюць судовымі позвамі.

Запуск амерыканскага рэмейку брытанскага серыяла «Малакасосы» («Skins») выліўся ў скандал: супраць шоу, якое толькі што стартавала ў эфіры, пратэстуюць грамадскія арганізацыі, якія пагражаюць судовымі позвамі, а ўчора яго кінула ўжо трэцяя спонсарская кампанія — да аўтамабільнай General Motors і сеткі закусачных Taco Bell далучылася Wrigley, якая забараніла рэкламаваць падчас шоу шакаладныя батончыкі Mars. «Кампанія вырашыла не паказваць ніякай сваёй рэкламы падчас гэтага шоу, бо мы ніколі не падтрымлівалі змест, які мог бы абразіць нашых кліентаў», — гаворыцца ў афіцыйным прэс-рэлізе. Такімі меркаваннямі кіраваліся і астатнія кампаніі.

Акрамя рэкламадаўцаў на баку абуранай грамадскасці выступіў і медыягігант Viacom, заснавальнік MTV, які асцярожна папрасіў музычны канал «прыбраць частку найбольш адкрытых сцэн» у наступных эпізодах шоу.

Зрэшты, ні ўгаворванні, ні пагрозы, ні адток рэкламных грошай пакуль ніяк не паўплывалі на пазіцыю самога MTV. «Мы ўпэўненыя, што „Малакасосы“ будуць і далей радаваць аўдыторыю, для якой гэтае шоу было створанае,

Прэм’ера серыяла «Малакасосы» адбылася на тэлеканале MTV на мінулым тыдні. Шоу зрабілася несумненным хітом — яго паглядзела каля 3,3 мільёна чалавек, але ў навінах «Малакасосы» з’явіліся зусім з іншай нагоды. Яшчэ да прэм’еры, як толькі быў прадстаўлены пашыраны трэйлер, амерыканская адвакацкая група «Тэлевізійная рада бацькоў» (Parents Television Council, PTC) у сваім аглядзе апісала тэлесерыял (найбліжэйшым аналагам якога можна назваць расійскую «Школу» Гай-Германікі) як «вельмі небяспечны». А пасля з’яўлення шоу ў эфіры PTC падала петыцыю ў юрыдычныя камітэты абедзвюх палат парламента ЗША з просьбай пачаць расследаванне па фактах «магчымага сэксу з удзелам непаўналетніх».

У прынцыпе, дадзеная працэдура цалкам можа выліцца ў рэальныя судовыя працэсы, што і прымусіла рэкламадаўцаў як мага хутчэй адмежавацца ад падтрымкі серыяла.

Амерыканскія «Малакасосы» з’яўляюцца рэмейкам аднайменнага ангельскага серыяла, які з поспехам транслюецца па брытанскім платным лічбавым канале E4. У ім расказваецца пра тынэйджараў 16–18 гадоў (з чым і звязаная згадка «сэксу непаўналетніх»). Нягледзячы на відавочную правакацыйнасць, серыял атрымаў некалькі прызоў брытанскіх кіна-і тэлеакадэмій; яго рэгулярная аўдыторыя складае каля 900 тысяч чалавек. У Брытаніі серыял ухваляла прэса, але былі і іншыя водгукі: яго крытыкавалі за стэрэатыпных і нерэалістычных персанажаў, а таксама за агрэсіўную рэкламную кампанію (якая атрымала прэмію ад супольнасці маркетолагаў).

Якіх-небудзь праблем з падлеткамі, якія паглядзелі серыял, у Англіі адзначана не было. Тым не менш, у англійскай мове замацаваўся выраз «skins party», які азначае вар’яцкую вечарынку ў стылі герояў шоу. У 2007 годзе адна дзяўчына размясціла ў сацыяльнай сетцы MySpace заклік ўсім ахвотным прыйсці да яе на такое свята — заявіліся каля 200 чалавек, якія нанеслі шкоду, ацэненую ў 2 тысячы фунтаў стэрлінгаў, зрэшты, пасля яна сказала, што яе профіль быў узламаны.

Перш чым амерыканцы вырашылі рабіць уласных «Малакасосаў», арыгінал быў часткова паказаны на канале BBC America — праўда, пераход з платнага вяшчання не прайшоў для шоу бясследна: былі выразаныя некаторыя сцэны і «запіканая» частка абсцэннай лексікі.

• 0
• 0
• 0
• 0
• 0
• 0
• 0
• 0