«Санктум» — ніцшэанская стужка, якую бы ўпадабалі ў Трэцім Рэйху
Пячорная эўтаназія ад Джэймса Кэмерана
ЗША — Аўстралія, 2010, каляровы, 3D, 109 хв.
Рэжысёр: Алістэр Грырсан
Ролі выконваюць: Рычард Роксбург, Ёан Грыфіт, Рыз Уэйкфілд, Эліс Паркінсан, Дэніэл Уілі, Крыстафэр Бэйкер
Жанр: Прыгоды
Адзнака: 6 (з 10)
Група дайвераў спускаецца ў глыбокую зямную пячору. Але трапічны цыклон адсякае ім шлях наверх. У герояў ёсць шанец выбрацца, калі яны знойдуць шлях да акіяна, абмінаючы небяспечныя падводныя пасткі.
Карціна, спрадусаваная Джэймсам Кэмеранам, — суворыя прыгоды ў экстрэмальных умовах. Заблытаныя чорныя лабірынты, новыя хваробы, бяздонныя правалы, падземная рака-мясакрутка павышаюць стаўкі гульні. Цана — жыццё.
Але, хаця фільм пастаўлены паводле рэальных падзей, што адбыліся са сцэнарыстам карціны Эндру Уайтам,
карціна — архаічны рытуал з пячорнай ідэалогіяй.
Джэймс Кэмеран паклапаціўся, каб падводныя здымкі адбыліся па стэрэатэхналогіі «Аватару» — з аб’ёмнымі эфектамі, ценямі, халодным падземным колерам.
У падземных пячорах разыгрываецца бязлітасная барацьба за выжыванне мацнейшага.
Спачуванне паслядоўна дыскрэдытуецца,бо прыводзіць да слабасці. А слабасць — паніка, якой мусіць не быць. Цэнтральны эпізод «моцы» — эўтаназія. Галоўны герой вучыць свайго сына, што Бога няма дый абвяшчае сябе пячорным стодам.
Кожны стод патрабуе ахвяраў, якія не прымусяць сябе чакаць.
Пад маскаю экстрэмальных прыгодаў — паганскае стодапакланенне, якое ўпадабалі б у Трэцім Рэйху.
Але так здарылася, што ніцшэанскія ідэі атабарыліся ў карціне рэжысёра-дэбютанта з невядомымі акцёрамі. Аўстралійская прырода й Джэймс Кэмеран адшліфавалі гэтыя ідэі да небяспечнага 3D-відовішча.
Цяпер чытаюць
Анжаліка Мельнікава пасля знікнення набыла дзве кватэры ў Мінску92
Каментары