Ён не арыштаваны, але знаходзіцца пад падпіскай аб нявыездзе.
Андрэй Мікалаеў, якога абвінавачваюць ва ўдзеле ў масавых беспарадках 19 снежня, абураны дзеяннямі следства. Ён не арыштаваны, але знаходзіцца пад падпіскай аб нявыездзе. Андрэй Мікалаеў паведаміў:
— Мне патэлефанаваў следчы і сказаў, каб я паехаў на вуліцу Чыгладзэ, 22. На будынку я ўбачыў шыльду: .“Следчая экспертная наркалагічная камісія” Як жа я быў здзіўлены, калі мне там паведамілі, што я з 2007 года стаю на ўліку як алкаголік. Але калі б гэта было праўдай, то са мной бы нарколаг размаўляў і нейкае лячэнне б прызначыў. Трэба ж было б прайсці адпаведнае абследаванне.
Я ўчора глядзеў “Контуры”, дзе казалі, што на акцыі былі адны крымінальнікі і п'яніцы. Лічу, што цяпер адмыслова мяне паставілі на ўлік заднім чыслом. Улада хоча абяліць сябе, ачарняючы ўдзельнікаў акцыі. У мяне там доктар спытаў, якога чысла я мог выпіваць пасля 19 снежня. А я вам скажу праўду, калі я прыйшоў дадому пасля таго жаху, што я бачыў, то, сапраўды, напіўся. Пакуль я быў на гэтай камісіі, бачыў, як прывезлі яшчэ двух чалавек у аўтазаку. Пачуў прозвішча аднаго, здаецца Пазняк. Канваір казаў, што палітычных прывезлі. Відаць, гэта тыя, каго трымаюць пад вартай. Я не ўтойваю, што ў свае 35 гадоў маю чатыры судзімасці. Раней я ніколі не ўдзельнічаў у акцыях апазіцыі. 19 снежня пайшоў паглядзець, як усё адбываецца насамрэч і параўнаць з тым, што потым кажуць і паказваюць па БТ. Я асабіста шкло не біў. Я быў ў першым ланцугу на ганку Дома ўраду. Здымаў усё на фотакамеру. Калі да мяне прыйшлі праз некалькі дзён пасля акцыі, то адразу спыталі, што я зняў і ці паспеў нешта скінуць у інтэрнэт. Сёння я пайшоў у следчы камітэт на вуліцу Сапёраў, дзе мне вярнулі камеру і дыскі, а вінчэсцер аддаць адмовіліся. Сказалі, што яго яшчэ трэба правяраць”.
Следчы не сказаў Андрэю Мікалаеву, калі яго справу перададуць у суд. Некалькі разоў яго дапытвалі ў вайсковай контрразведцы і да сённяшняга дня больш нікуды не выклікалі.
Цяпер чытаюць
«На такую х**ню павялася». Расіянка прыехала з Сібіры ў Беларусь і цяпер з мацюкамі расказвае, як тут складана жыць26
Каментары