Аляксандр Пыльчанка па-ранейшаму ўзначальвае прэзідыум Мінскай гарадской калегіі адвакатаў

19 сакавіка адбыўся агульны сход Мінскай гарадской калегіі адвакатаў, які праходзіў у закрытым рэжыме. Паводле неафіцыйнай інфармацыі, прадугледжвалася, што на ім можа быць пераабраны старшыня прэзідыума МГКА Аляксандр Пыльчанка, які выступаў з крытыкай адносна сітуацыі ў беларускай адвакатуры.

У прыватнасці, 18 лютага ў інтэрв’ю БелаПАН Пыльчанка выказаў занепакоенасць адносна незалежнасці беларускіх адвакатаў. Так ён пракаментаваў рашэнне Мінюста аб пазбаўленні ліцэнзій чатырох адвакатаў МГКА — Алега Агеева, Таццяны Агеевай, Уладзіміра Толсціка і Тамары Гараевай, якія абаранялі фігурантаў справы аб масавых беспарадках у Мінску 19 снежня.

У той жа дзень, 18 лютага, загадам міністра юстыцыі Галаванава Пыльчанка быў выключаны са складу Кваліфікацыйнай камісіі па пытаннях адвакацкай дзейнасці ў Беларусі. 25 лютага прэзідыум Рэспубліканскай калегіі адвакатаў асудзіў стыль працы Пыльчанкі і прызнаў немагчымым далейшае выкананне ім абавязкаў старшыні МГКА.

Рашэнне аб пераабранні Пыльчанкі можа прыняць толькі агульны сход Мінскай гарадской калегіі адвакатаў.

Як вынікае з кароткага паведамлення, размешчанага на сайце МГКА, на агульным сходзе былі заслуханыя справаздачы старшыні калегіі, яго намеснікаў і старшыні рэвізійнай камісіі, разгледжаныя пытанні выканання прыходна-расходнага каштарысу за 2010 год і прыходна-расходнага каштарысу на 2011 год, абраны новы склад рэвізійнай камісіі, праведзены давыбары ў склад прэзідыума МГКА.

Хто менавіта даабраны ў склад прэзідыума і ў сувязі з чым, не ўказана. Мяркуючы па ўсім, размова ідзе пра месца, якое вызвалілася ў прэзідыуме пасля выключэння з МГКА Паўла Сапелкі. Рашэнне аб выключэнні Сапелкі было прынятае 3 сакавіка. У яго дзеяннях прэзідыум калегіі ўгледзеў парушэнні «патрабаванняў Крымінальна-працэсуальнага кодэкса, Правілаў прафесійнай этыкі адваката, а таксама рашэнняў органа адвакацкага самакіравання».

Сапелка абараняў кандыдата ў прэзідэнты на выбарах-2010 Андрэя Саннікава, кіраўніка выбарчага штаба кандыдата Віталя Рымашэўскага Паўла Севярынца і лідара міжнароднай маладзёжнай арганізацыі «Малады фронт» (Чэхія) Змітра Дашкевіча. Ён лічыцца адным з найбольш прафесійных і найбольш прынцыповых адвакатаў Беларусі, які на працягу многіх гадоў браўся за абарону фігурантаў гучных палітычных працэсаў.

• 0
• 0
• 0
• 0
• 0
• 0
• 0
• 0