Некалькі набліжаных асобаў былога прэзідэнта Кіргізіі Курманбека Бакіева затрыманыя ў Расіі, паведамляюць мясцовыя СМІ са спасылкай на МУС Кіргізіі.
Як расказаў начальнік галоўнага ўпраўлення крымінальнага вышуку МУС Цілек Алібаеў, следчыя выехалі ў Расію 2 чэрвеня.
«Яны затрымалі восем злачынцаў, якія знаходзяцца ў міждзяржаўным і міжнародным вышуку, трое з іх праходзілі падазраванымі па крымінальных справах, распачатых па падзеях чэрвеня 2010 на поўдні краіны», — сказаў Алібаеў.
Ён дадаў, што 8 чэрвеня ў Маскве быў затрыманы Сяргей Касцюк, былы чалец камісіі па кіраванні актывамі і начальнік аддзела
«Ён быў фінансістам Максіма Бакіева (сына Курманбека Бакіева) і мог бы праліць святло на тое, куды сышлі грошы з рахункаў сям’і Бакіевых. Цяпер вырашаецца пытанне аб яго экстрадыцыі», — дадаў Алібаеў.
Прозвішчы іншых затрыманых ён адмовіўся назваць.
У красавіку 2010 года ў Кіргізіі адбыўся дзяржаўны пераварот. Курманбек Бакіеў пакінуў краіну, цяпер ён жыве ў Беларусі. Улада перайшла ў рукі часовага кааліцыйнага ўрада на чале з Розай Атунбаевай, які складаецца з лідараў апазіцыйных партый. У чэрвені 2010 года ў краіне быў праведзены рэферэндум, на якім была прынятая Канстытуцыя і зацверджаныя паўнамоцтвы Атунбаевай у якасці прэзідэнта пераходнага перыяду.
