Жыхар Баранавічаў жорстка збіў маці і выкінуў яе з кватэры паміраць
Жанчына некалькі гадзін праляжала на падлозе ў агульным калідоры маласямейкі, але ніхто з суседзяў не выклікаў медыкаў.
Трагедыя адбылася ў адной з маласямеек у Паўночным мікрараёне ўвечары 10 жніўня.
Збітая жанчына, якую сын выштурхаў з пакоя, некалькі гадзін праляжала на падлозе ў агульным калідоры маласямейкі, але ніхто з суседзяў не выклікаў медыкаў. Ад атрыманых траўмаў гараджанка памерла.
Як паведаміў пракурор г. Баранавічы Аляксей Більдзейка, цела 46-гадовай жанчыны каля чатырох раніцы 11 жніўня ў калідоры дома выявіў сусед.
Паводле папярэдняй інфармацыі, вечарам 10 жніўня паміж загінулай і яе 26-гадовым сынам пасля сумеснага распівання спіртных напояў успыхнула сварка. Мужчына стаў збіваць маці. Па словах пракурора, сын нанёс маці шматлікія ўдары па галаве і тулаве, пасля чаго выкінуў яе ў калідор, дзе праз некалькі гадзін жанчына памерла.
«Гараджанка працяглы час праляжала на падлозе. І я думаю, што людзі хадзілі, бачылі — калідор у доме вялікі, кватэр шмат — але чамусьці ніхто не дапамог жанчыне, не паведаміў аб тым, што здарылася. Як такое магло адбыцца? Чаму людзі настолькі абыякава паставіліся да чужой бяды? Не разумею», — здзіўляецца Аляксей Більдзейка.
Па дадзеных пракурора, мужчына працаваў грузчыкам, раней прыцягваўся да адміністрацыйнай адказнасці за парушэнне грамадскага парадку ў п’яным выглядзе, а таксама быў судзімы за пагрозу забойства. Гараджанін затрыманы і змешчаны ў ізалятар часовага ўтрымання. У дачыненні да яго 11 жніўня пракуратурай распачата справа па п. 6 ч. 2 арт. 139 КК (забойства, учыненае з асаблівай жорсткасцю).
Музыка Цім Суладзэ: Розніца 30 гадоў — тое, што адпавядае маім уяўленням пра адносіны38
Каментары