Нацыянальная авіякампанія «Белавія» з пераходам на зімовы расклад (30 кастрычніка) зменіць праграму палётаў у Маскву.
У прыватнасці, як паведаміла прэс-служба авіякампаніі, штодзённы ранішні рэйс № B2-1984/83 Мінск — Масква — Мінск будзе перанесены з маскоўскага аэрапорта Шарамецьева ў Дамадзедава. Час выканання рэйса застаецца ранейшым.
Час вылету рэйса № B2-1954 Мінск — Масква (Дамадзедава) пераносіцца з 21.25 на 22.25. У зваротным напрамку рэйс № B2-1953 Масква (Дамадзедава) — Мінск будзе выконвацца ў 6.30.
«Пасля ўвядзення сумесных з кампаніяй „Трансаэра“ спецыяльных тарыфаў па напрамках Нью-Ёрк, Маямі, Таронта, Пекін і Ганконг было шмат просьбаў з боку пасажыраў па паляпшэнні стыковак рэйсаў у Маскве. Таму было прынята рашэнне па аптымізацыі раскладу, — расказаў генеральны дырэктар НАК „Белавія“ Анатоль Гусараў. — Новы час выканання рэйсаў будзе спрыяць больш зручным стыкоўкам з дзясяткамі расійскіх і замежных авіякампаній. Таксама значна палепшацца стыкоўкі з авіякампаніяй S7, што выконвае палёты з аэрапорта Дамадзедава ў пункты Расійскай Федэрацыі».
У межах аптымізацыі раскладу палётаў у Маскву з 22 верасня 2011 года будзе спынена выкананне рэйса № B2-1974/73 Мінск — Масква (Унукава) — Мінск.
Пасажыры, якія загадзя купілі ці забраніравалі білет на адмененыя і змененыя рэйсы, будуць у індывідуальным парадку праінфармаваныя. Білеты будуць бясплатна перабраніраваныя на іншы зручны для кліента час, паведамляе «Белавія».
Каментары