Тыя, каму з розных прычынаў не выдалі грошы, атрымае дапамогу ў кастрычніку.
У рэдакцыю «Нашай Нівы» пачалі масава звяртацца чытачы, якія самі або іх родныя з нейкіх прычынаў не змаглі атрымаць 500 тысяч рублёў. Яны скардзяцца, што іх няма ў спісах на атрыманне.
У сувязі з гэтым нагадаем некалькі ключавых момантаў, што датычаць парадку атрымання аднаразовай матэрыяльнай дапамогі.
Хто налічвае грошы:
Аднаразовую дапамогу выплачвае тая ж установа, якая і налічвае пенсію/заробак. Таму ў выпадку, калі вас з нейкіх прычын не ўключылі ў спіс, звяртацца трэба непасрэдна туды.
Дзе атрымаць грошы:
Матэрыяльная дапамога будзе налічаная па месцы атрымання пенсіі (у выпадку з пенсіянерамі) і заробку (для бюджэтнікаў, якія працуюць).
Калі пенсіянер атрымлівае пенсію ў банку, то 500 тысяч яму налічаць на рахунак. Калі на пошце, то там жа і налічаць дапамогу на гародніну. Пенсіянеры, якім пенсію прыносяць на дом, такім жа чынам атрымаюць і дапамогу.
Чаму вас маглі не ўключыць у спіс:
Спісы атрымальнікаў дапамогі з ліку пенсіянераў фармуюцца на падставе пенсійных спраў. Адпаведна, грамадзяне, якія звольніліся з працы да 1 верасня 2011 года, але з нейкіх прычын не праінфармавалі аб гэтым упраўлення сацыяльнай абароны, могуць не патрапіць у спісы. У такім выпадку трэба звярнуцца з працоўнай кніжкай ва ўпраўленне па месцы атрымання пенсіі.
Хто мае права на атрыманне дапамогі:
— непрацуючыя пенсіянеры (незалежна ад памеру пенсіі);
— атрымальнікі дапамогі па доглядзе за дзецьмі ва ўзросце да 3 гадоў; па доглядзе за дзіцём-інвалідам ва ўзросце да 18 гадоў, а таксама за інвалідам I групы, састарэлым, якія дасягнулі 80 гадоў; — бацькі, якім выдзяляецца дапамога на дзіця, інфіцыраванае ВІЧ;
— жыхары Беларусі, якія на 1 верасня 2011 г. з’яўляліся працаўнікамі бюджэтных арганізацый і іншых арганізацый, якія атрымліваюць субсідыі, работнікі якіх прыраўнаваны па аплаце працы да бюджэтнікаў;
— ваеннаслужачым, асобам начальнiцкага i шарагавога складу органаў унутраных спраў, органаў і падраздзяленняў па надзвычайных сітуацыях, органаў фінансавых расследаванняў КДК.
На 500 тысяч не могуць прэтэндаваць:
— пенсіянеры, якія працуюць;
— асобы, якія па стане на 1 верасня 2011 г. знаходзіліся на дзяржзабеспячэнні;
— асобы, якія атрымліваюць пенсіі з іншых дзяржаў і беларускую пенсію за мяжой.
— вайскоўцы тэрміновай службы;
— асобы, якія знаходзяцца ў месцах пазбаўлення волі.
Калі вы ёсць у спісе, але з нейкіх прычыне не паспелі атрымаць дапамогу ў верасні, такая магчымасць у вас захоўваецца ў кастрычніку, гарантуюць у Міністэрстве працы і сацабароны.
Каментары