Сашу Варламаву выставілі новае абвінавачванне

Вядомаму беларускаму мадэльеру Аляксандру Варламаву выставілі новае абвінавачанне. Цяпер яму інкрымінуецца таксама махлярства ў дачыненні да бацькоў дзяцей, якія навучаліся ў цэнтры моды.

17 траўня 2011 у дачыненні да Варламава была распачатая крымінальная справа па ч. 2 арт. 426 (перавышэнне службовых паўнамоцтваў) Крымінальнага кодэкса Беларусі. Паводле паведамлення прэс-службы МУС, падставай для крымінальнага пераследу сталі матэрыялы праверкі ГУУС Мінгарвыканкама, якая ўстанавіла факты сістэматычнага прысваення і выкарыстання не па прызначэнні ў 2007–2010 гадах грашовых сродкаў у суме звыш 300 мільёнаў рублёў. Гэтыя грошы нібыта прызначаліся для выдачы ў выглядзе камандзіровачных выдаткаў чальцам дэлегацый, якія ўдзельнічалі ў правядзенні паказаў па-за межамі Беларусі ў рамках фестывалю «Млын моды», а падазраваны мадэльер паклаў іх у сваю кішэнь.

Ужо праз тры дні Варламаў быў арыштаваны і яму выставілі абвінавачанне ўжо па двух артыкулах Крымінальнага кодэкса Беларусі — па ч. 2 арт. 426, якая была раней, і па ч.3 арт.210 (крадзеж шляхам злоўжывання службовымі паўнамоцтвамі ў буйным памеры). Паводле дадзеных следства, акрамя выкарыстаных не па прызначэнні 300 мільёнаў рублёў вядомы мадэльер нібыта скраў 120 тыс. еўра. Цяпер у справе з’явіліся новыя абвінавачванні і дадатковыя сумы шкоды.

Паводле дадзеных следства, мастацкі кіраўнік цэнтра сучаснага стылю і моды Universum models Беларускага дзяржаўнага ўніверсітэта, начальнік Цэнтра моладзевай моды Беларускага дзяржаўнага ўніверсітэта, з 2007 па 2010 гг., «шляхам падману і злоўжывання даверам, дзейнічаючы з карыслівай і іншай асабістай зацікаўленасці, перавышаючы свае службовыя паўнамоцтвы, у мэтах здзяйснення крадзяжу грашовых сродкаў даў незаконныя ўказанні падначаленым яму работнікам на ажыццяўленне незаконнага збору грашовых сродкаў з бацькоў дзяцей, якія бралі ўдзел у паказах мод у якасці мадэляў падчас правядзення міжнародных творчых майстэрняў за мяжой».

Так, паводле дадзеных следства, перад кожнай паездкай у краіны Еўропы Варламаў браў ад 220 да 450 еўра з аднаго чалавека. Збор гэтых сродкаў матываваўся неабходнасцю пагасіць выдаткі на паездку, але насамрэч выдаткі ўжо аплачваліся з іншай крыніцы. Як ўпэўненыя следчыя, сабраныя грашовыя сродкі былі перададзеныя Варламаву, які распарадзіўся імі ў сваіх карыслівых мэтах.

Паводле падлікаў следчых, усяго за названы перыяд часу Варламаў завалодаў грашовымі сродкамі на агульную суму не менш за 35 мільёнаў рублёў.

• 0
• 0
• 0
• 0
• 0
• 0
• 0
• 0