У Баранавічах і Пінску забаранілі правядзенне пікетаў супраць збяднення насельніцтва
Па адной такой акцыі з колькасцю ўдзельнікаў да 30 чалавек планавалася правесці ў гэтых гарадах 28 студзеня з 12.00 да 13.00. Заяўкі на пікеты падавалі мясцовыя актывісты Беларускай партыі левых «Справядлівы свет».Мэта акцый — выказаць пратэст супраць рэзкага зніжэння ўзроўню жыцця людзей, павышэння цэн на тавары і паслугі.
Як паведаміў заяўнік пікету ў Пінску Міхаіл Раманцаў, улады забаранілі акцыю на той падставе, што яна намячалася не на вызначаным для такіх мерапрыемстваў месцы.
«Мы мелі намер правесці пікет каля ўваходу на гарадскі рынак, што знаходзіцца на вуліцы Ленінградскай. Там шмат людзей, асабліва ў выхадныя дні. Падаваць заяўку зімой на стадыён або летнюю эстрадную пляцоўку ў гарадскім парку, якія ў нашым горадзе ўлада вызначыла для масавых мерапрыемстваў, бессэнсоўна», — дадаў Раманцаў.
Паводле слоў аднаго з заяўнікаў пікета ў Баранавічах Віктара Цяпіна, яны планавалі акцыю ў старым парку культуры і адпачынку на вуліцы Камсамольскай. Гэта пляцоўка выдзелена Баранавіцкім гарвыканкамам для масавых мерапрыемстваў.
«З адказу, які я атрымаў, вынікае: пікет забаронены, таму што заяўка на яго не адпавядае патрабаванням артыкулаў 5 і 6 закона „Аб масавых мерапрыемствах“. І больш нічога. Я лічу, чыноўнікі шукаюць любыя прычыны, каб забараніць няўгодную ім акцыю. Абскардзіць гэтыя забароны, як паказвае практыка, — дарэмна», — заявіў Цяпін.
Дапоўнім, што заяўку на пікет на 28 студзеня супраць збяднення насельніцтва падавалі брэсцкія актывісты партыі «Справядлівы свет». Брэсцкі гарвыканкам дазволіў акцыю пры ўмове, што яе заяўнік да 26 студзеня пададуць дагаворы з органамі ўнутраных спраў, установай аховы здароўя і камунальным прадпрыемствам.
«Мы былі вымушаныя адмовіцца ад пікетавання, таму што ў нас няма сродкаў для аплаты іх паслуг, — паведаміла БелаПАН старшыня брэсцкай гарадской партыйнай структуры Людміла Дзенісенка. — Мы маем намер праз суд дамагчыся адмены аплаты арганізатарамі масавых мерапрыемстваў расходаў, звязаных з правядзеннем масавых мерапрыемстваў. Усе дзяржслужбы, з якімі павінны заключацца такія дагаворы, утрымліваюцца за кошт падаткаплацельшчыкаў, якімі мы таксама з’яўляемся».
Разведка ЗША: Беларусь стала перадавым вайсковым плацдармам Расіі24
Каментары