Ён заявіў, што будзе змагацца іншымі метадамі.
Віцебскі актывіст Кансерватыўна-хрысціянскай партыі - БНФ Сяргей Каваленка, які адбывае пакаранне ў магілёўскай калоніі №19, спыніў галадоўку, паведаміла БелаПАН яго жонка.
Па словах Алены Каваленкі, 24 мая Сяргея наведаў адвакат.
"Адвакат сказаў, што галадоўку Сяргей спыніў, будзе змагацца іншымі метадамі. Зараз ён знаходзіцца ў каранціне, яму выдалі спецвопратку. Медыцынскае абследаванне не праводзілася. Адвакат сказаў, што пачуваецца Сяргей больш-менш", - распавяла жонка апазіцыянера.
Яна таксама паведаміла, што адвакат рыхтуе наглядную скаргу ў Віцебскі абласны суд на прысуд Каваленкі.
***
Нагадаем, што 18 мая Віцебскі абласны суд адхіліў касацыйную скаргу актывіста Кансерватыўна-хрысціянскай партыі — БНФ Сяргея Каваленкі на прысуд суда Першамайскага раёна Віцебска.
27 лютага суд Першамайскага раёна пад старшынствам Алены Жук прызнаў Каваленку вінаватым ва ўхіленні ад адбыцця пакарання ў выглядзе абмежавання волі (арт. 415 КК). Гаворка ідзе аб пакаранні, вынесеным апазіцыянеру ў маі 2010 года за вывешванне бел-чырвона-белага сцяга на галоўнай навагодняй ёлцы Віцебска, — тры гады пазбаўлення волі ўмоўна. Каваленка быў затрыманы 19 снежня 2011 года і з тых часоў знаходзіцца ў зняволенні.
Разгляд касацыйнай скаргі ў абласным судзе пачаўся 10 красавіка. Тады судовая калегія Віцебскага абласнога суда прыняла рашэнне накіраваць Каваленку на комплексную псіхіятрычную экспертызу ва ўмовах стацыянара. У выніку апазіцыянер быў накіраваны ў РНПЦ псіхічнага здароўя ў Навінках, дзе амаль на працягу месяца праводзілі экспертызу яго псіхічнага здароўя. Эксперты прызналі яго псіхічна здаровым. Экспертыза была прызначаная ў сувязі з галадоўкай, якую Каваленка трымаў больш за два месяцы ў знак пратэсту супраць свайго арышту і падчас якой ён страціў амаль палову ўласнага вагі.
13 красавіка, знаходзячыся ў РНПЦ, Каваленка галадоўку спыніў. 8 мая, пасля пераводу з Навінак назад, у віцебскі следчы ізалятар № 2, апазіцыянер аднавіў акцыю пратэсту.
Каментары