Суд пачнецца не пазней за жнівень.
Старшыня КДБ Вадзім Зайцаў заявіў, што цягам дзесяці дзён справа з замахам на здзяйсненне тэракта ў Жлобіне будзе накіравана ў суд. Ён паведаміў, што цяпер падазраваны праходзіць псіхалагічную экспертызу.
«Гэта нескладаная крымінальная справа, яна практычна завершаная, паколькі відавочныя ўсе доказы спробы здзяйснення тэракту», —
адзначыў Зайцаў.
Праз гэтыя дзесяць дзён, згодна з Крымінальна-працэсуальным кодэксам, пракурор цягам пяці дзён павінен прыняць рашэнне аб перадачы справы ў суд. Суддзя ж у тэрмін да месяца з дня паступлення справы павінен прызначыць судовае разбіральніцтва.
24 мая ў Жлобіне каля будынка міліцыі быў затрыманы 21-гадовы малады чалавек. Па інфармацыі КДБ, на твары ў яго была маска з надпісам на арабскай мове, а пры сабе — ёмістасці з запальнай сумессю і самаробнай выбуховай прыладай магутнасцю каля пяці кілаграмаў у трацілавым эквіваленце.
Ён
«спрабаваў здзейсніць тэрарыстычныя дзеянні ў дачыненні да супрацоўнікаў падраздзялення МУС па месцы іх дыслакацыі».
Спачатку малады чалавек кінуў бутэльку ў будынак, каб адцягнуць увагу міліцыянтаў. А сам пачаў злучаць драты ў выбухоўцы. Але ў гэты момант яго затрымалі.
У КДБ заявілі, што
затрыманы мае сувязі з арганізаванай злачыннай групай па перапраўцы грамадзян Афганістана ў адну з еўрапейскіх краін.
У той час ёсць і інфармацыя, што затрыманы — не зусім адэкватны чалавек.
1 чэрвеня маладому чалавеку было прад’яўлена абвінавачанне ва ўчыненні злачынства, якое кваліфікуецца паводле ч. 1 арт. 14 і ч. 1 арт. 289 КК (замах на ўчыненне акту тэрарызму). Пакаранне прадугладжана ад 8 да 15 гадоў пазбаўлення свабоды.
За гэты год у краіне здарыліся яшчэ два выбухі.
25 красавіка ў Кобрыне выбухнула граната, у выніку чаго загінулі два чалавекі. Крымінальную справу кваліфікавалі як тэрарызм. А тыднем раней у Гомелі спрацавала самаробная прылада ў гандлёвай зале адной з крамаў.
На прадэманстраваным тады відэа з крамы выбух па магутнасці нагадваў хутчэй выбух петарды.
Крымінальную справу распачалі па артыкуле «пагроза здзяйснення акта тэрарызму». Адметна, што на той дзень у КДБ былі прызначаны міжведамасныя камандна-штабныя вучэнні па тэме «Арганізацыя і ажыццяўленне мер дзяржаўнага рэагавання на акты тэрарызму».
Цяпер чытаюць
Малодшы сын Сахашчыка абвешчаны зніклым без вестак. Выглядае, ён ваяваў за Расію81
Каментары