Аляксандр Мілінкевіч пераабраны на пасаду старшыні руху «За Свабоду» Такое рашэнне прынята 20 кастрычніка практычна аднагалосна (75 — за, адзін устрымаўся) дэлегатамі трэцяйсправаздачна-выбарнай канферэнцыі арганізацыі ў Мінску.
Мілінкевіч быў адзіным кандыдатам на пасаду старшыні. Як зазначыў пры вылучэнні яго кандыдатуры намеснік старшыні руху Юрый Губарэвіч, менавіта Аляксандр Мілінкевіч «застаецца абліччам сучаснай дэмакратычнай Беларусі». «Мы павінны захаваць лідарства ў арганізацыі, што дазволіць руху ў далейшым дзейнічаць больш паспяхова», — сказаў палітык.
Пасля працэдуры галасавання Мілінкевіч заявіў, што чакаў свайго выбрання. «Абяцаю не быць старшынёй бясконца, зараз пастараюся працаваць яшчэ лепш», — сказаў ён.
На канферэнцыі таксама прыняты папраўкі ў статут, якія ўводзяць пасаду першага намесніка старшыні. Як зазначыў Мілінкевіч, старшыня ў значнай ступені выконвае прадстаўніцкія функцыі. «Але нехта ж павінен займацца непасрэдна працай, гэта павінен быць другі чалавек у руху — першы намеснік старшыні. Апрача таго, рух пашырае сваю дзейнасць, рэалізуюцца новыя праграмы. Працы хопіць і на першага намесніка, і на двух звычайных», — сказаў лідар арганізацыі.
Сваіх намеснікаў Мілінкевіч прапанаваў асабіста, альтэрнатыўныя кандыдатуры не вылучаліся.
Першым намеснікам старшыні выбраны Юрый Губарэвіч, якога Мілінкевіч назваў «класным менеджарам».«Ён мог бы добра арганізоўваць працу, каардынаваць кірункі дзейнасці і выкананне рашэнняў», — сказаў Мілінкевіч.
Намеснікамі старшыні сталі Алесь Лагвінец і Галіна Скараход.Як зазначыў Мілінкевіч, Лагвінец «душу і сэрца аддаваў руху, быў яго выдатным прадстаўніком на міжнароднай арэне», а Скараход — «адказны і ўплывовы чалавек, добра вядомы ў трэцім сектары».
Няўдалае тэхнічнае рашэнне дорага абышлося арганізатарам галасавання ў Каардынацыйную раду12
Каментары