Грамадзкасьць гораду пачала сыстэматычнае пазьменнае дзяжурства каля прызначанага да зносу будынку канца XIX ст.
Грамадскасць Гродна пачала сістэматычнае пазменнае дзяжурства каля прызначанага да зносу будынка канца XIX стагоддзя на вуліцы Урыцкага, 5. Пра гэта паведаміў БелаПАН адзін з актывістаў кампаніі ў абарону гістарычнага цэнтра Гродна Алесь Залеўскі.
Паводле яго слоў, з двухпавярховага цаглянага жылога будынка, што знаходзіцца ў гістарычным цэнтры горада, ужо выселілі людзей, адключылі газ і электрычнасць, пачалі разбіраць дах. "Адзінае, што стрымлівае ўлады ад неадкладнага зносу будынка - гэта дзеянні моладзі і адсутнасць інвестара, які б пажадаў укладваць капітал у будаўніцтва на месцы жылога дома. Каардынацыйны камітэт кампаніі "Выратуем Гродна" сканцэнтраваў сваю ўвагу на абароне гэтага будынка, архірэйскай стайні канца XVIII - пачатку XIX стагоддзя, на месцы якой прадугледжваецца ўзвядзенне праваслаўнай царквы, а таксама старога моста цераз Нёман. На днях яго збіраюцца закрыць на рэканструкцыю і пашырэнне, у выніку чаго рэзка павялічыцца паток машын і нагрузка на гістарычны цэнтр Гродна", - сказаў А.Залеўскі.
Апрача таго, паводле яго слоў, актывісты кампаніі распаўсюджваюць па горадзе інфармацыйныя матэрыялы, што распавядаюць аб планах уладаў па зносе гістарычных будынкаў у цэнтры горада і дзеяннях грамадскасці.
Нагадаем, што да 10 чэрвеня грамадскасць Гродна плануе зацвердзіць спіс членаў ініцыятыўнай групы для правядзення мясцовага рэферэндуму па праблемах горадабудаўніцтва і аховы гістарычнага цэнтра горада. Для гэтага неабходна сабраць подпісы 10% выбаршчыкаў Гродна (каля 20 тысяч чалавек). Падрыхтоўчую працу плануецца завяршыць да 10 чэрвеня, пасля чаго ў Гродзенскі гарвыканкам будзе перададзены спіс членаў ініцыятыўнай групы і пытанні, што выносяцца на мясцовы рэферэндум.
Каля гэтага будынка вядзецца вахта
Каментары