Беларускія тэнісісты ў чарговы раз нагадалі нам усім, што воля гарады бярэ.
Беларускія ліцэісты працягваюць вучыцца самастойна, затое па-беларуску. Ужо няма сумневаў, што гэты навучальны год яны давучацца. Будучыня ж Ліцэю залежыць ад таго, ці ўдасца ў чэрвені нармальна зрабіць новы, чарговы набор. Ліцэй патрабуе сталай увагі і падтрымкі незалежнага грамадзтва.
У Расеі зарэгістраваныя сем кандыдатаў у прэзыдэнты. Дзіўная кампанія ідзе! Усе б’юць сябе ў грудзі як сапраўдныя апазыцыянэры, але пры гэтым ніводзін не наважваецца заявіць: Пуцін ня здольны даць рады тэрору, ён загруз у Чачэніі, ён вінаваты ў разьвязваньні вайны, якую трэба неадкладна спыніць, — хоць такіх думак трымаецца значная частка выбарцаў. Пра тое, чаму такая бязьветранасьць у палітычнай атмасфэры, трохі гавораць зьвесткі пра даходы расейскага палітычнага істэблішмэнту на старонцы 7.
Прадстаўнікі намэнклятуры, што перайшла ў апазыцыю, утварылі новы грамадзкі рух. Ён называецца «За перамены». Новага ў ім тое, што 147 заснавальнікаў руху адразу ж вылучылі свайго кандыдата на выбары-2006 — няўдачніка кампаніі’2001 Аляксандра Ярашука. Сыходзіць з «Маладога фронту» Севярынец — пра гэта на старонцы 5.
Сярод нашаніўскіх матэрыялаў мінулага нумару палеміку выклікала думка ці, дакладней, гіпотэза, пункцірам абазначаная ў калёнцы Вацлава Заякоця. Вось яна: грамадзкім дзеячам варта цалкам адмовіцца ад палітычнай дзейнасьці дзеля захаваньня магчымасьці культурнай, арганічнай працы, раз ужо аўтарытарная ўлада дазваляе рабіць усё, акрамя таго, што не кранае самой улады наўпрост. Што й казаць, паражэнскае меркаваньне, нешта накшталт філязофіі «Тыгодніка Паўшэхнага» і Кола «Знак» у часы Гамулкі. Пачытайце, што адказвае Заякоцю Ўладзімер Колас.
Андрэй Дынько
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары