У Вілейскім раёне Мінскай вобласці паводле падазрэння ў нелегальным промысле затрыманая група паляўнічых-мінчукоў. Мужчыны вярталіся з палявання на птушак, калі іх аўтамабіль спынілі для праверкі супрацоўнікі Мінскай абласной інспекцыі аховы жывёльнага і расліннага свету. У салоне яны знайшлі тушку падстрэленай вушатай савы.
Як паведамляе Дзяржаўная інспекцыя па ахове жывёльнага і расліннага свету, кіроўца растлумачыў, што падстрэліў саву нібыта памылкова, пераблытаўшы яе з качкай. Відавочна, страляў па няясна бачнай цэлі, што ўжо з'яўляецца парушэннем. За рэдкую птушку са спіса СІТЕС, абвешчаную ў Беларусі птушкай года, яму давядзецца кампенсаваць шкоду — 31,5 млн рублёў.
У дзеяннях паляўнічых дзяржінспектары ўбачылі прыкметы і іншых парушэнняў. Апрача сваёй зброі, у аўтамабілі яны перавозілі стрэльбу, што належыць пабочнай асобе. Большасць знойдзеных патронаў былі заражаныя карцеччу і кулямі, хаця пры паляванні на дзікіх птушак дазволены выключна шрот.
Яшчэ большыя падазрэнні выклікаў знешні выгляд аднаго з затрыманых: на руках мужчыны былі бурыя плямы, як мяркуецца, кроў, а на адзенні — кавалачкі шэрсці. Адзенне і нож паляўнічага, а таксама змывы з яго рук адпраўленыя на экспертызу.
У працэсе разбору да месца спынення аўтамабіля наблізілася іншая машына. Як толькі дзяржінспектары накіраваліся ў яе бок, кіроўца зрабіў рэзкі паварот і хутка паехаў.
Акалічнасці справы расследуе Вілейскі РАУС. Вырашаецца пытанне аб распачынанні дзвюх крымінальных спраў за незаконнае паляванне.
Цяпер чытаюць
Беларускі IT-мільярдэр Гурскі: Маю першую жонку забіў гемблер2
Каментары