Меркаваныя санкцыі супраць беларускіх бізнэсменаў і юрыдычных асобаў, датычных да супрацоўніцтва з рэжымам Аляксандра Лукашэнкі, маюць быць агучаныя і прынятыя літаральна днямі — называецца дата 17 снежня.

фота Depositphotos.com

Але не ўсё так проста. Дый дата няпэўная — магчымы варыянт, што іх прыняцце зацягнецца яшчэ на месяц. 

Санкцыйныя спісы рыхтаваліся ў абстаноўцы строгай сакрэтнасці еўрапейскімі службамі, роля беларускіх дзеячаў была ў межах «акрэслівання кірункаў».

Вядома, што шырокамасштабнага эканамічнага ціску не будзе, размовы пра адключэнне банкаўскай сістэмы SWIFT — толькі размовы.

Блакаванне SWIFT пакуль не гатовая падтрымаць ніводная краіна-сябар Еўрасаюза. 

На прыкладзе іншых прэцэдэнтаў, у прыватнасці, Ірана, заходнікі зразумелі, што прывядзенне краіны да стану гуманітарнай катастрофы нясе рызыкі для Еўрасаюза. Асабліва адчувальна гэта можа быць, калі ўводзіць санкцыі супраць дзяржавы ля самых межаў саюза. 

Поўны спіс юрыдычных і прыватных асобаў, якія маюць трапіць пад санкцыі, у публічнай прасторы не публікаваўся.

У першапачатковай версіі ў яго маглі трапіць каля 70 чалавек з афіляванымі бізнэсамі, у выніковай версіі іх нібыта застанецца толькі каля 30 — некаторым удалося прыбраць сябе з-пад санкцый. 

Крыніцы «Нашай Нівы» сцвярджаюць, што некаторым бізнэсоўцам удалося давесці еўрапейцам, што яны ў гэтым спісе лішнія. 

Паводле неправераных чутак, Аляксандр Машэнскі, напрыклад, мог бы быць у спісе, але, нібыта, давёў уладам Ісландыі — краіне, адкуль імпартуе рыбу на сотні мільёнаў даляраў, — што ўдар па яго бізнэсе будзе азначаць канкрэтныя страты для Ісландыі. А кіраўніцтва той краіны нібыта прыняла яго пазіцыю і паўплывала на рашэнне Еўрасаюза. 

Мы звязаліся з уласнікам «Санта-Брэмар». Як прызнаўся Машэнскі карэспандэнту «Нашай Нівы», ён ведае, што яго прозвішча сапраўды было ў першапачатковым санкцыйным спісе. Але ён кажа, што такую трактоўку варта лічыць непраўдзівай, бо заходнікі найперш разглядаюць унёсак асоб і бізнесаў у летнія падзеі, да якіх ён не мае ніякага дачынення. 

«Але словы аб аргументах пра аб'ёмы экспарту рыбы — гэта казкі! Я думаю, што ў тых, хто складае гэтыя спісы, ёсць пэўныя крытэрыі ўключэння. Напэўна, карэктна ставіць пытанне аб тым, ці адпавядае «Санта-Брэмар» гэтым крытэрыям? Можа, мы расстрэльвалі дэманстрантаў? Можа, мы — «кашалькі», — у тэрміналогіі аўтараў? Я не думаю. Я думаю, што яны прымаюць рашэнні не на падставе інфармацыі, хто колькі рыбы экспартуе, а на падставе іншых крытэрыяў, якім «Санта-Брэмар» не адпавядае», — сказаў Машэнскі. 

Пры гэтым ён пацвердзіў, што пэўныя захады аб выключэнні кампаніі са спісаў ім прымаліся, але якія канкрэтна, тлумачыць не стаў. У агульных рысах ён назваў гэта тлумачэннем

Калі ўявіць, што расказаная нам схема праўдзівая, то па такім жа прынцыпе маглі дзейнічаць і іншыя бізнэсмены, выводзячы свае актывы з-пад магчымага ўдару.

Таксама пакуль невядомы лёс «Акта аб дэмакратыі, правах чалавека і суверэнітэце», які меўся прыняць Сенат ЗША. Справа ў тым, што да Новага года прыняць яго не паспяваюць, бо кангрэсмэны сыходзяць на калядныя вакацыі. Далей зацверджанне можа зацягнуцца праз пераходны перыяд, звязаны з перадачай улады ў ЗША да Джо Байдэна.

Вынік пасяджэння ў Сенаце будзе залежыць ад паўнаты інфармацыі па беларускім кейсе і ад таго, наколькі яны будуць гатовыя кіравацца рэкамендацыямі.

Таксама пакуль няма пэўнасці з сустрэчай Святланы Ціханоўскай і Байдэна. 

Палітычныя праціўнікі дэмакратаў у ЗША звяртаюць увагу, што да ўступлення прэзідэнта на пасаду ягоны штаб не можа мець замежнапалітычных кантактаў, таму, маўляў, як можна анансаваць такія сустрэчы? Асабліва пасля скандалаў з саветнікам па нацыянальнай бяспецы Майклам Флінам, які перад уступленнем на пасаду Дональдам Трампам сустрэўся з расійскім паслом у Вашынгтоне.

Вядома, што не было такіх анонсаў і з боку амерыканцаў — толькі інтэрпрэтацыі журналістаў, але ў пэўным сэнсе такія фармулёўкі нашкодзілі меркаванай сустрэчы.

Хочаш падзяліцца важнай інфармацыяй ананімна і канфідэнцыйна?