Учора стала вядома, што памёр шматгадовы прэс-сакратар МНС Віталь Навіцкі. Многія ўспаміналі, як у 2020 — 2021-м ён публічна пакрываў палітычныя звальненні калег і нават катаванні на Акрэсціна. Але некаторыя дэталі яго біяграфіі былі да ўчарашняга дня невядомыя публіцы. Толькі пасля смерці іх раскрылі яго паплечнікі.
Да 2020-га ў Віталя Навіцкага была рэпутацыя рэдкага працаўніка дзяржструктур, які не хаваецца ў кусты, калі яму задаюць пытанні.
Актыўны ў твітары, ён быў адкрыты і да каментавання надзвычайных падзей, рэдка калі выкручваўся і быў калі не сказаць што любімым прэс-сакратаром сярод журналістаў, то прынамсі ў топе. Па яго словах і пазіцыі многія складвалі ўражанне аб усім ведамстве — у Міністэрства па надзвычайных сітуацыях (МНС) было пазітыўнае рэнамэ.
Але тое змянілася пасля жніўня 2020-га.
Пачалося ўсё з таго, як кажуць калегі, што ў Навіцкага з'явілася новая функцыя — кантролю за сацсеткамі супрацоўнікаў МНС. Некаторыя звольненыя па палітычных прычынах звязвалі свой «сыход» непасрэдна з рэкамендацыямі гэтага цэнзара.
Калі ратавальнікаў пачалі выкарыстоўваць для барацьбы з беларускай сімволікай, Навіцкі знік з твітара.
«З твітарам яму дапамагала шмат людзей як дабраахвотнікі, па сваім жаданні: недзе відэа зняць, нешта пафоткаць, раздрукаваць. Пасля падзей 2020-га ён падтрымкі ўсіх гэтых людзей пазбавіўся, яму сказалі ўсе, літаральна: «На нас не разлічвай». Кантакты звяліся да мінімуму ў рамках службовых абавязкаў. А адвярнуліся ад яго ўсе таму, што ён пачаў хлусіць аб абставінах звальнення ратавальнікаў і заплюшчваў вочы на абурэнне грамадства здыманнем сцягоў», — расказвае былы калега Навіцкага.
Пасля гэтага акурат настаў час, калі пачаліся масавыя чысткі нелаяльных у дзяржаўных структурах.
«Пра аднаго супрацоўніка ён публічна казаў, што звольніўся сам, хаця ўсе ведалі, што ноччу да яго [пажарнага] у вёску прыязджалі кадравік і кадэбэшнік і прымушалі падпісваць рапарт. Іншага, у Фрунзенскім раёне, выклікалі, уручылі працоўную кніжку, і проста з пажаркі той паехаў на суткі, пра гэта ўсе ў калектыве ведалі, а Навіцкі талдычыў сваё», — расказвае «Нашай Ніве» былы ратавальнік.
Прэс-сакратар у гэты ж час паўтараў мантру, што ўсе «палітычныя» самі пішуць заявы на звальненне: «У арганізацыі любой формы ўласнасці існуюць парадак, патрабаванні і правілы, выконваць якія пры прыёме на працу, а ўжо тым больш на службу, абавязуецца кожны працаўнік. Наш ужо былы калега 11 жніўня падаў рапарт на звальненне, выказваючы тым самым сваю нязгоду з устаноўленым парадкам, які да гэтага часу яго задавальняў. Яго просьба была задаволеная. Што да паўторнага прыёму на службу ў органы і падраздзяленні па надзвычайных сітуацыях, то такая практыка існуе», — казаў ён пра пажарнага Юрыя Крывашэя, якога звальнялі ў прысутнасці работніка КДБ.
Але нават калег з МНС і журналістаў здзівіла, што ў дзень смерці прэс-сакратара спачуванні прыйшлі яму з зусім нечаканага боку.
Ёсць такі тэлеграм-канал лукашэнкаўцаў «Людажор», які складаецца з недарэалізаваных журналістаў, што пішуць свае рэфлексіі па матывах падзей.
Прэзідэнта Зяленскага там называюць «накураным зелібобам», украінцаў — «шумерамі». Як там называлі беларусаў, то лепш і не ведаць.
Гэтая суполка таксама паставіла сабе за мэту шкодніцтва недзяржаўным СМІ. Яны выдумлялі праўдападобныя і не вельмі байкі, закідвалі ў рэдакцыі пад выглядам фактаў, а потым ад імёнаў «сведкаў» падманвалі журналістаў, якія і так працавалі ва ўмовах падполля ці выгнання, калі твае магчымасці праверыць інфармацыю ўскладненыя.
Поспехі ў гэтай справе ў іх бывалі рэдка, але калі такое атрымлівалася, суполка ў фарбах апісвала, як надурыла рэпрэсаваных журналістаў. Такі прымітыўны спосаб падрыву даверу да працы СМІ.
І вось учора ў «Людажоры» пра Навіцкага напісалі так:
«Апроч асноўнай работы, Віталік быў сябрам суполкі «Людажор», аб гэтым ведала вельмі абмежаванае кола людзей, але салідны кавалак свайго часу ён выдаткоўваў на не зусім бачны інфармацыйны фронт. Працаваў, застаючыся ў цені. Мы страцілі не толькі калегу, але і сябра».
Навіцкаму быў 41 год. Прэс-сакратаром МНС працаваў з 2006 года.
Каментары