Vobraz apazycyjanera-kalabaranta na BT dastaŭ. Azaronak, znajdzi niešta novaje!.. Jak, naprykład, nakont kałaradzkaha žuka?
Feljeton Lolika Uškina.
Pakul što ciažka ŭjavić, što praź piać hadoŭ zachapleńnie ad teleprahladu čarhovaha mardaboju Van Dama abłamaje reklamna-sacyjalny blok: «La-la-la… Bałotnaja čapla. U Biełarusi viadoma dva miescy hniezdavańnia. Kałaradzki žuk. Viadomy dva dačnyja ŭčastki pražyvańnia. Dyk bieražycie bratoŭ našych mienšych».
Ja heta da taho, što dziaržava biez bazaru vyrašyła zrabić Doryphora decemlineata hałakost. Suprać biča biełaruskich aharodaŭ budzie ŭžyty niejki superhienetyčny sort bulby. Dla «Beatles from Colorado», jak śćviardžajuć Łysienki, zžerci jaje liście — toje samaje, što alkanaŭtu ampułu pad myšku zašyć.
Ščyra kažučy, ciažka ŭjaŭlaju sabie mechanizm hienetyčnaj mutacyi. Pastaŭcie siabie na miesca kałaradzkaha turysta, u jakoha zranku, pakul jon nia źjeść jak minimum paru kustoŭ, u rocie sušniak, dryžać łapy i nie ŭstajuć kryły. Vy ciahnieciesia na kropku pa bulbiany apachmieł i, zakinuŭšysia paŭkusta hienetyčna madyfikavanaj bulby, razumiejecie, što niešta tut nia tak. Vas abo ciahnie na vanity, abo pušyć na panos, abo ŭ vas adrastajuć hrudzi, abo vy prosta kaŭbasiciesia u pieradśmiarotnych kanvulsijach. U lubym vypadku vy paśpiavajecie skazać žuku-korašu, jaki staŭ u čarzie za vami: «Šuryk, heta niejkaje haŭno!» Zacaniŭšy vaš fizyčny stan (u najhoršym vypadku jašče i śviežy trup), saplašnik zrobić lahičnaje reziume: nu jaho na fih, hetuju bulbu žerci. Tut ža adny pestycydy! Pierajdu lepš na šynnyja pokryŭki».
Jak bačym, kałaradzki žuk jaki žyŭ u štacie Kałarada zadoŭha da taho jak kamančy pačali jeści draniki, istota niepieramožnaja.
Adnak heta nia značyć, što dziaržava pavinna apuścić ruki.
Čytajučy dniami cudoŭnuju knižku polskaj žurnalistki Danuty Źmit-Zavierušnaj pra štodzionnaje žyćcio ŭ Polščy za kamunaj, znajšoŭ cikavy frahment. Akazvajecca, prychod kałaradzkaha žuka byŭ u PNR abstaŭleny hlabalnaj prapahandysckaj kampanijaj. Poźniaj viasnoj 1950 hodu «Trybuna ludu» paviedała, što samaloty NATO skinuli nad plažami Pamorja desant žukoŭ-bulbažeraŭ. Adnak «inwazja stonki nie przeszkodzi nam w pokojowej pracy», zapeŭniła polskaja «Saŭbiełka». Heta było praloham vialikaj histeryi. Byli stvorany 24 non-stop-stancyi traktaroŭ, jakija pavinny byli niščyć vusiakoŭ pa pieršym syhnale z paloŭ, usie dzieci źbirali žukoŭ, kab atrymać pierachodny čyrvony ściah. Čytajučy Danutu, adčuvaješ šarm nastalhii i razumieješ, što taja akcyja nie była farmalizmam. Niščyć žukoŭ-špijonaŭ — heta ramantyčna, estetyčna i sacyjalna!
Čamu b našaj dziaržavie taksama nie źviazać nastupnuju pieradvybarnuju kampaniju z kryžovym pachodam na działki, pastaviŭšy apazycyjanera na adnu došku z kałaradzkim žukom. Darečy, PNR pratrymałasia paśla zhadanaj kampanii jašče 35 hadoŭ. Chto viedaje — mahčyma, dziakujučy kałaradzkamu žuku!
Ciapier čytajuć
Na aŭtašou ŭ Lidzie ledź nie zahinuŭ adzin z samych znakamitych kaskadzioraŭ Biełarusi — jaho videa sabrali amal paŭmiljarda prahladaŭ. Što ź im ciapier?4
Kamientary