Pradstaŭnictva Jeŭrasajuza złaviła biełaruskaje telebačańnie na padmanie
Uvahu Pradstaŭnictva ES u Biełarusi pryciahnuła paviedamleńnie Ahienctva navinaŭ Biełaruskaj dziaržaŭnaj teleradyjokampanii ad 13 vieraśnia.
U telesiužecie, jak paviedamlaje Pradstaŭnictva ES, pierajnačany źmiest vystupu Kamisara Štefana Fiule na plenarnym pasiadžeńni Jeŭraparłamienta ŭ Strasburhu 11 vieraśnia. U svaim vystupie jon zakranuŭ pytańni cisku z boku Rasii na krainy Uschodniaha partniorstva.
Pa viersii BT, Štefan Fiule zajaviŭ, što «ES u pieršuju čarhu zacikaŭleny ŭ tradycyjna mocnych suviaziach svaich uschodnich partnioraŭ z Maskvoj. Jeŭrakamisar taksama dadaŭ, što Brusel akaža Mytnamu sajuzu dapamohu ŭ vyraŭnoŭvańni standartaŭ i normaŭ u adpaviednaści ź jeŭrapiejskim i suśvietnym zakanadaŭstvam».
Pradstaŭnictva ES prapanuje całkam pasaž z vystupu Fiule, pryśviečany hetaj prablemie: «Heta praŭda, što siabroŭstva ŭ Mytnym sajuzie niesumiaščalnaje z «hłybokimi i ŭsioabdymnymi zonami volnaha handlu», pieramovy pra stvareńnie jakich my viadziem z Ukrainaj, Małdovaj, Hruzijaj i Armienijaj. I heta nie praź ideałahičnyja adroźnieńni — havorka nie idzie pra sutyknieńnie ekanamičnych błokaŭ ci «hulni z nulavoj sumaj». Heta praz pravavuju niesumiaščalnaść: u pryvatnaści, nielha adnačasova źmienšyć mytnyja taryfy pavodle normaŭ DCFTA i padniać ich zychodziačy z abaviazańniaŭ u ramkach siabroŭstva ŭ Mytnym sajuzie.
Novaje pakaleńnie damovaŭ pra asacyjacyju daść vielizarnyja pieraŭtvaralnyja pieravahi, asabliva praź zbližeńnie pravavych i rehulatyŭnych normaŭ, praź libieralizacyju rynku. Niezaležnyja daśledavańni pakazvajuć, što DCFTA pryniasie značnyja pieravahi. Z časam ekspart u ES moža padvoicca, zabiaśpiečyŭšy pry hetym amal 12-adsotkavy rost VUP. Adnak kab dasiahnuć hetaha, našy partniory pavinny vałodać poŭnym suvierenitetam u farmavańni svajoj handlovaj palityki, u toj čas jak u čalcoŭ Mytnaha sajuzu jaho nie budzie.
Niesumnieŭna, krainy-ŭdzielnicy Uschodniaha partniorstva zmohuć umacoŭvać svajo supracoŭnictva z Mytnym sajuzam, mahčyma, u jakaści naziralnikaŭ. I, viadoma, udzieł u DCFTA całkam sumiaščalny z damovami pra volny handal, jakija dziejničajuć pamiž našymi partniorami i inšymi krainami Sadružnaści niezaležnych dziaržaŭ (SND).
Dazvolcie mnie padkreślić, što Damovy pra asacyjacyju i DCFTA nie zadumany ŭ škodu Rasii. Naadvarot, Rasii pryniasie vielizarnuju karyść intehracyja krain Uschodniaha partniorstva ŭ ahulnajeŭrapiejskuju ekanomiku. Naša bačańnie składajecca ŭ tym, što ŭ doŭhaterminovaj pierśpiektyvie hetyja damovy pavinny paspryjać farmavańniu ahulnaj ekanamičnaj prastory ad Lisabona da Uładzivastoka, zasnavanaha na praviłach SHA.
Takim čynam, my zaachvočvajem umacavańnie našymi partniorami svaich suviaziaŭ z Rasijaj — hetak ža, jak umacoŭvajem hetyja suviazi i my. Adnak takoje ŭmacavańnie pavinna być sumiaščalnaje z abaviazańniami ŭ ramkach damovaŭ pra asacyjacyju i stvareńnie DCFTA. Jeŭrapiejski sajuz hatovy pracavać sa svaimi susiedziami i šukać šlachi da bolšaha narmatyŭnaha zbližeńnia pamiž ES i čalcami Mytnaha sajuza».
Kamientary