U dakumiencie Dziarždepartamienta «Vydumki prezidenta Pucina: 10 iłžyvych zajaŭ ab situacyi va Ukrainie», havorycca nastupnaje:
«Taja traktoŭka situacyi, jakuju prapanuje Rasija, imknučysia apraŭdać svaje dziejańni va Ukrainie, - heta toje, čaho śviet nie bačyŭ z taho času, jak Dastajeŭski napisaŭ: «Ja zhodny, što dvojčy dva čatyry — cudoŭnaja reč, ale kali ŭžo ŭsio chvalić, to i dvojčy dva piać — čaroŭnaja časam štučka».
Nižej pryvodziacca dziesiać zajaŭ prezidenta Pucina, pry dapamozie jakich jon sprabuje apraŭdać rasijskuju ahresiju suprać Ukrainy. Za hetymi zajavami iduć fakty, jakija ihnarujucca albo skažajucca.
1. Pucin kaža: Rasijskija vojski ŭ Krymie zajmajucca vyklučna tym, što abaraniajuć rasijskuju vajennuju majomaść. Nie rasijskija vojski, a «hramadzianskija hrupy samaabarony» zachapili infrastrukturu i vajennyja abjekty ŭ Krymie.
Fakty: Jość pierakanaŭčyja dokazy taho, što za dobra arhanizavanymi antyŭkrainskaj siłami ŭ Krymie stajać rasijskija siłavyja struktury. Choć bajcy hetych padraździaleńniaŭ apranutyja ŭ formu biez znakaŭ adroźnieńnia, jany jeździać na mašynach z rasijskimi vajennymi numarami i adkryta pradstaŭlajucca pradstaŭnikam mižnarodnych srodkaŭ masavaj infarmacyi i ŭkrainskim vajennym supracoŭnikami rasijskich siłavych struktur. Bolš za toje, hetyja ludzi ŭzbrojenyja srodkami, jakija zvyčajna niedastupnyja hramadzianskamu nasielnictvu.
2. Pucin kaža: Dziejańni Rasii nie vychodziać za ramki Damovy ab siabroŭstvie pamiž Ukrainaj i Rasijskaj Fiederacyjaj ad 1997 hoda.
Fakty: Pahadnieńnie ad 1997 hodu patrabuje ad Rasii pavažać terytaryjalnuju cełasnaść Ukrainy. Vajennyja dziejańni Rasii va Ukrainie, u vyniku jakich Rasija ŭziała pad svoj kantrol Krym, całkam vidavočnym čynam parušajuć terytaryjalnuju cełasnaść i suvierenitet Ukrainy.
3. Pucin kaža: Apazicyja nie vykanała ŭmovy pahadnieńnia ad 21 lutaha z byłym prezidentam Viktaram Janukovičam.
Fakty: U pahadnieńni ad 21 lutaha byŭ vykładzieny płan, u adpaviednaści ź jakim Rada pavinna była pryniać zakonaprajekt, u jakim adnaŭlajecca dziejańnie na terytoryi Ukrainy Kanstytucyi 2004 hoda, h.zn. viartańnie krainy da parłamienckaj sistemy kiravańnia. U adpaviednaści z pałažeńniami hetaha pahadnieńnia Janukovič pavinien byŭ padpisać adpaviedny zakon na praciahu 24 hadzin i takim čynam urehulavać kryzis mirnym šlacham. Janukovič admoviŭsia vykanać hetuju damoŭlenaść. Zamiest hetaha jon sabraŭ rečy i ŭciok, pakinuŭšy paśla siabie śviedčańni bujnamaštabnaj karupcyi.
4. Pucin kaža: Urad Ukrainy nielehitymny. Janukovič zastajecca zakonnym kiraŭnikom Ukrainy.
Fakty: 4 sakavika prezident Pucin sam pryznaŭ, što ŭ Janukoviča «niama palityčnaj budučyni». Paśla taho jak Janukovič źbieh z Ukrainy, navat jaho «Partyja Rehijonaŭ» adviarnułasia ad jaho, prahałasavaŭšy za jaho adchileńnie ad pasady i padtrymaŭšy novy ŭrad. Novy ŭrad Ukrainy byŭ zaćvierdžany demakratyčna abranym parłamientam Ukrainy - 371 hołasam, h.zn. absalutnaj bolšaściu - bolš čym 82 pracentami hałasoŭ.
Časovy ŭrad Ukrainy źjaŭlajecca ŭradam naroda. Jon paviadzie krainu pa šlachu da demakratyčnych vybaraŭ, pryznačanych na 25 traŭnia - da vybaraŭ, jakija daduć mahčymaść usim ukraincam vyrašać los svajoj krainy.
5. Pucin kaža: Heta humanitarny kryzis, i sotni tysiač ludziej biahuć z Ukrainy ŭ Rasiju ŭ pošukach prytułku.
Fakty: U dadzieny momant absalutna ništo nie śviedčyć pra humanitarny kryzis. Ništo taksama nie śviedčyć pra patok biežancaŭ, što biahuć z Ukrainy ŭ Rasiju ŭ pošukach palityčnaha prytułku. Mižnarodnyja arhanizacyi, jakija pracujuć u krainie, vyvučajuć stanovišča, razmaŭlajučy z ukrainskimi pamiežnikami, jakija taksama abviarhajuć hetuju infarmacyju. Niezaležnyja žurnalisty, jakija nazirali za situacyjaj na miažy, taksama ničoha nie paviedamlajuć pra jaki-niebudź patok biežancaŭ.
6. Pucin kaža: Pad pahrozaj znachodziacca etničnyja ruskija.
Fakty: Kali nie ličyć rasijskaj presy i rasijskaha dziaržaŭnaha telebačańnia, to nie isnuje dakładnych źviestak ab tym, što kamuści z etničnych ruskich niešta pahražaje. Novy ŭrad Ukrainy z samaha pačatku abviaściŭ adnym z pryjarytetaŭ padtrymańnie miru i prymireńnie.
Alaksandr Turčynaŭ admoviŭsia padpisać zakonaprajekt, jaki zabaraniaje vykarystańnie ruskaj movy ŭ rehijonach. Etničnyja ruskija i ruskamoŭnaje nasielnictva padpisvajuć pietycyi, u jakich zajaŭlajuć, što nie padviarhajucca jakim-niebudź pahrozam. Bolš za toje, z momantu stvareńnia novaha ŭrada ŭ Kijevie adnoŭlena spakojnaje stanovišča. Rezkaha rostu złačynnaści nie nazirajecca, maradziorstva nie zafiksavana, palityčnyja supierniki nie pieraśledujucca.
7. Pucin kaža: Pad pahrozaj apynulisia rasijskija bazy.
Fakty: Rasijskija vajskovyja abjekty byli i zastajucca ŭ poŭnaj biaśpiecy, i novy ŭrad Ukrainy abaviazaŭsia vykonvać umovy ŭsich isnujučych mižnarodnych pahadnieńniaŭ, u tym liku tych, jakija datyčacca rasijskich baz. Pahrozie z boku rasijskich vajskoŭcaŭ padviarhajucca ŭkrainskija bazy ŭ Krymie.
8. Pucin kaža: Na poŭdni i ŭschodzie Ukrainy adbyvajucca masavyja napady na cerkvy i sinahohi.
Fakty: Relihijnyja lidary krainy i mižnarodnyja arhanizacyi, jakija abaraniajuć svabodu vieravyznańnia, kažuć pra toje, što vypadkaŭ napadu na cerkvy nie zafiksavana. Lidary ŭsich relihijnych supołak Ukrainy, u tym liku pradstaŭniki Ukrainskaj pravasłaŭnaj carkvy, padparadkavanaj Maskoŭskaj Patryjarchii, zajavili pra svaju padtrymku novaha palityčnaha kiraŭnictva, paklikaŭšy da nacyjanalnaha jadnańnia i narmalizacyi situacyi. Pradstaŭniki jaŭrejskich supołak z paŭdniovych i ŭschodnich abłaściej Ukrainy kažuć pra toje, što vypadkaŭ prajavy antysiemityzmu bolš nie nazirajecca.
9. Pucin kaža: Kijeŭ imkniecca destabilizavać situacyju ŭ Krymie.
Fakty: Časovy ŭrad Ukrainy prajaŭlaje strymanaść i imkniecca da dyjałohu. Rasijskija vojski, adnak, vychodziać za miežy svaich baz, zachoplivajučy palityčna značnyja abjekty ŭ Krymie. Ukrainski ŭrad nieadkładna nakiravaŭ u Krym ministra abarony, kab razradzić situacyju. Piatra Parašenku, druhoha emisara, nakiravanaha ŭ Krym dla naładžvańnia dyjałohu, nie puścili ŭ parłamient Kryma.
10. Pucin kaža: Rada schilnaja da ŭpłyvu ekstremistaŭ i terarystaŭ.
Fakty: Rada - samy pradstaŭničy orhan ułady va Ukrainie. Apošnija zakanadaŭčyja akty byli pryniatyja značnaj bolšaściu hałasoŭ, u tym liku pradstaŭnikoŭ uschodnich rehijonaŭ Ukrainy. Skrajnie pravyja ultranacyjanalistyčnyja hrupy, niekatoryja ź jakich udzielničali ŭ adkrytych sutyknieńniach ź siłami biaśpieki padčas pratestaŭ na Majdanie, u Radzie nie pradstaŭleny. Ništo nie śviedčyć pra toje, što ŭrad Ukrainy maje namier pravodzić palityku dyskryminacyi. Naadvarot, jany publična zajavili pra advarotnaje».
Kamientary