Rasijskaja prapahanda razvaročvajecca ŭ bok Biełarusi
Uvieś apošni hod Rasija viadzie sapraŭdnuju infarmacyjnuju vajnu suprać Ukrainy. Prapahanda zakranaje i Biełaruś. Pryčym usio čaściej niepasredna. Siońnia na fiederalnych telekanałach možna pačuć vykazvańni pra toje, što ŭ Minsku vyprostvajuć plečy nacyjanalisty. Biełaruskija telekanały ŭsio heta puskajuć u efir.
Na hetym tydni telekanał ANT pakazaŭ vypusk rasijskaj prahramy «Vriemia idiet», dzie havorka išła pra toje, jak abjadnać ruski śviet i padtrymać ruskich, jakija paśla raspadu SSSR apynulisia ŭ Kazachstanie, Ukrainie, Biełarusi i inšych postsavieckich krainach.
Jak Biełaruś adkaža na rasiejskuju prapahandu?
Viadučyja i hości ŭ studyi byli zakłapočanyja tym, što ŭ Biełarusi «nacyjanalizm vyprostvaje plečy». U jakaści arhumientu pakazali kadry z Dnia voli, dzie ŭdzielniki akcyi skandujuć «Chto nie skača, toj maskal», a taksama pomnik Suvoravu z płakatam «Vorah Biełarusi».
«Čamu Rasija nie ŭkładvaje hrošy, kab takija tablički stavili la pomnikaŭ Kalinoŭskamu?» — aburyŭsia adzin z udzielnikaŭ prahramy.
Taksama prahučali idei ab tym, što ludziam, jakija ličać siabie ruskimi treba vydać rasijskija pašparty, a moładź pryciahvać u Rasiju adukacyjnymi prahramami.
Pres-sakratar telekanała ANT, jaki retranślavaŭ prahramu ŭ Biełarusi, zajaviła, što da zapusku ŭ efir pieradaču prahledzieli, ale nijakaj kramoły tam nie znajšli.
«Kantent «Pieršaha» rasijskaha telekanała nas całkam zadavalniaje, — adznačyła Julija Duboŭskaja. — Tam ža prymali ŭdzieł hości ź Biełarusi. Jany vykazali punkt hledžańnia našaj krainy».
Adnym ź biełaruskich haściej prahramy byŭ lidar Libieralna-demakratyčnaj partyi Siarhiej Hajdukievič.
«Treba razumieć, što Biełaruś nikoli nie admovicca ad svajho suvierenitetu. My z rasijanami braty. Ale ličym, što navat braty pavinny žyć u roznych kvaterach, a nie na ahulnaj kuchni», — zajaviŭ jon u efiry.
Namieśnik staršyni partyi Aleh Hajdukievič, jaki taksama ŭdzielničaŭ u zapisie pieradačy, u kamientary dla Naviny.by adznačyŭ, što na fonie padziej va Ukrainie na rasijskim telebačańni aktyvizavalisia marhinalnyja palityki. Choć siarod haściej prahramy «Vriemia idiet» byli i deputaty Dziarždumy. Člen KPRF Leanid Kałašnikaŭ, da prykładu, zajaviŭ, što prapahandysckija roliki nakštałt «Ja ruski akupant» treba zdymać za biudžetnyja hrošy.
«Na ahresiŭnuju rasijskuju prapahandu treba adkazvać biełaruskaj prapahandaj — uzvažanaj, spakojnaj, — kaža Aleh Hajdukievič. — Usie zaściarohi ab tym, što ŭ Biełarusi aktyvizavalisia nacyjanalisty, nie majuć padstavaŭ».
Ci treba zabaranić rasijskija kanały ŭ Biełarusi?
Na dumku Aleha Hajdukieviča, niama sensu błakavać rasijskija telekanały. «Treba dazvolić ŭsie ŚMI — i rasijskija, i amierykanskija, i jeŭrapiejskija. A hladač sam raźbiarecca, čamu vieryć, a čamu nie», — adznačaje Aleh Hajdukievič.
Miedyjaekśpiert Paŭluk Bykoŭski ličyć, što zabarona na tranślacyju telekanałaŭ mieła sens u časy, kali nie byŭ raspaŭsiudžany internet.
«Ciapier lubaja zabarona moža mieć advarotny efiekt — karystalniki buduć bolš aktyŭna šukać spasyłki na zabaronienyja pieradačy, — kaža jon. — U Biełarusi treba stvarać bolš ŭłasnaha jakasnaha kantentu, kab hledačy hladzieli naša telebačańnie. Siońnia ž samyja rejtynhavyja prahramy — rasijskaha vytvorčaści».
Ekśpiert tłumačyć heta tym, što ŭ Biełarusi telebačańniem kirujuć čynoŭniki, jakija dalokija ad razumieńnia miedyjarynku i tvorčaha pracesu. Akramia taho, biudžet rasijskich telekanałaŭ našmat bolš, čym u biełaruskich.
«Prapahanda rasijskich telekanałaŭ raźličana, pierš za ŭsio, na ludziej starejšaha pakaleńnia, jakija byli vychavany na idejach pra abjadnańnie ruskich ziemlaŭ z centram u Maskvie, tamu jany achvotna prymajuć siońniašnija razvahi pra toje, što Ukraina pavinna być u padnačaleńni Rasii», — adznačaje Bykoŭski.
Prapahanda na rasijskim telebačańni turbuje i palityčnyja struktury ŭ Biełarusi. Partyja BNF nakiravała list kiraŭnictvu Biełteleradyjokampanii, jakaja kiruje telekanałam «NTV-Biełaruś».
Staršynia BT Hienadź Davydźka adkazaŭ, što kampanija imkniecca «maksimalna źmiakčyć prapahandysckuju rytoryku» rasijskaha viaščańnia. Pry hetym, pavodle słoŭ Davydźki, u Biełarusi nikoli nie buduć błakavać rasijskija telekanały, jak heta było zroblena va Ukrainie.
«My zaraz žyviem u časy takoha infarmacyjnaj prastory, što zabaraniać što-niebudź biessensoŭna, bo ŭsio možna pahladzieć u internecie», - zajaviŭ jon.
Redaktar «SB Biełaruś siehodnia» Pavieł Jakubovič ličyć, što pryjšoŭ čas «bolš rezka kazać pra ŭpłyŭ rasijskaha telebačańnia na telehledačoŭ».
«Ja siabie pierasilvaju, kab pahladzieć pieradačy Sałaŭjova. Jon pastajanna vypuskaje Žyrynoŭskaha ŭ efir, jaki ŭvieś čas tranśluje nahniatańnie samych dzikunskich, adyjoznych fašysckich idej. Jon sieje nianaviść, zaklikaje spapialić Ukrainu, — zajaviŭ Jakubovič u efiry prahramy «Kłub redaktaraŭ» na kanale «Biełaruś 1». — My nie možam da hetaha spakojna stavicca, bo rasijskaje telebačańnie ŭ nas zajmaje ledź nie viadučaje miesca ŭ rejtynhach prahladu».
U svoj čas u Biełarusi byŭ zabaronieny da pakazu dakumientalny cykł «Chrosny baćka», nakiravany suprać Alaksandra Łukašenki. Na «NTV-Biełaruś» film vyrazali z efiru biez usialakich dyskusij. A niekatoryja niezaležnyja ŚMI, jakija pisali pra heta, atrymlivali papiaredžańni ad Mininfarma.
Zaraz siužety pra «kijeŭskuju chuntu» i «vialiki ruski śviet» štodnia vychodziać u efiry biełaruskich telekanałaŭ. Mabyć, pakul heta zadavalniaje ŭłady.
Kamientary