Dziaržkantrol: Dadzienyja pra inflacyju ŭ Biełarusi nie adpaviadajuć rečaisnaści, sapraŭdnyja — na 50—60% vyšejšyja

Kamitet dziaržaŭnaha kantrolu praanalizavaŭ spažyviecki rynak i zrabiŭ vysnovu, što dadzienyja pra inflacyju i rost cen na asnoŭnyja pradukty charčavańnia, jakimi apieruje aficyjnaja statystyka, nie adpaviadajuć rečaisnaści.

Adpaviednuju vysnovu zrabiŭ načalnik adździeła kantrolu spažyvieckaha rynku i śfiery pasłuh KDK Minskaj vobłaści Siarhiej Kazienka, analizujučy ŭ viedamasnym časopisie, jak farmujucca ceny ŭ krainie i jak vytvorcy i retejł abychodziać isnujučyja abmiežavańni.

Usia sprava ŭ tym, što rost cenaŭ na spažyvieckim rynku adsočvajecca nie pa ŭsich tavarach, jakich tysiačy, a pa pieraliku z 51 značnych pazicyj. Inšymi słovami, astatnija pazicyi aficyjnaja statystyka prosta nie ŭličvaje. Zrešty, sprava navat nie ŭ hetym, a ŭ tym, što i pa 51 najmieńni sacyjalna značnych tavaraŭ realnaja canavaja karcina istotna skažajecca. Pryčym časam Nacyjanalny statystyčny kamitet apieruje ličbami, jakija adroźnivajucca ad sapraŭdnych na 50—60%. Adbyvajecca heta tamu, što taja ž pastanova Ministerstva handlu №2 ad 2015/01/15 hoda «Ab cenach na sacyjalna značnyja tavary» rehuluje ceny na peŭny vid tavaraŭ, z kankretnym apisańniem.

U jakaści prykładu Siarhiej Kazienka pryvodzić taki važny pradukt, jak śmiatana. Zhodna z ukazanaj vyšej pastanovaj, cana abmiažoŭvajecca tolki na śmiatanu 25% tłustaści ŭ 500-hramovym pakunku. Praściej kažučy, možna vypuścić śmiatanu tłustaści 26% abo va ŭpakoŭcy 400 hramaŭ i spakojna abyści abmiežavańni, što i adbyvajecca zaraz u krainie. Jak vyśvietliŭ KDK, u bolšaści kram śmiatanu ŭ 500-hramovaj ŭpakoŭcy tłustaściu 25% nie bačyli ŭžo šmat miesiacaŭ. Vytvorcy prosta pierastali jaje vypuskać, choć u prejskurancie jana pa-raniejšamu prysutničaje i spravazdačy ab canie na jaje spraŭna pasyłajucca ŭ kantralujučyja viedamstvy i ŭ Biełstat.

Anałahičnym čynam iduć spravy i ź inšymi sacyjalna značnymi tavarami, jakija rehulujucca dziaržavaj i na asnovie jakich Biełstat padličvaje inflacyju ŭ krainie. Źmianiajecca nie tolki tara, ale i lubyja charaktarystyki tavaru, kab paźbiehnuć rehulavańnia koštu. Možna dadać u małako kalcyj, jakoha tam i tak bolš čym dastatkova, možna źmianić trochi skład tkaniny, možna pamianiać upakoŭku abo prosta pa-inšamu nazvać tavar, a dalej jaho pradavać pa svabodnaj canie. Pry hetym u statystyku adpraŭlajucca dadzienyja ab tavarach, jakija ŭžo daŭno nie vypuskajucca, a spažyviec chitrym markietynhavym chodam ŭvodzicca ŭ zman adnosna realnaj cany tavaru, bo nie kožny zmoža chutka padličyć, jak źmianiłasia cana ŭ pakunku ŭ 400 abo 800 hramaŭ ad standartnaj.

Jak adznačaje KDK, kab źmianić ciapierašni stan rečaŭ nieabchodna źmianić sam padychod da adsočvańnia cen i mietodyku statystyčnych nazirańniaŭ. Kantralory prapanujuć uziać za prykład zachodni dośvied. Havorka idzie pra toje, kab pakazvać adzinym abjomam, naprykład, adzin litr abo adzin kiłahram, a spažyŭcam ukazvać dźvie cany: canu prapanavanaj upakoŭki i canu litra abo kiłahrama.

• 0
• 0
• 0
• 0
• 0
• 0
• 0
• 0