Najbolšuju padtrymku ŭ apazicyi napisali Dabratvoru — 19%, najmienšuju — Chaščavackamu i Michaleviču, pa 0,5%
Na sajcie CVK źjavilisia vyniki hałasavańnia za kankretnych kandydataŭ u deputaty.
Nahadajem, što ŭsie pryviedzienyja ŭ materyjale ličby — padliki vybarčych kamisij, praviedzienyja ŭ pieravažnaj bolšaści biez mahčymaści kantrolu z boku naziralnikaŭ. Analizavać ich nie maje sensu, čaściakom u ich vyražajecca staŭleńnie miascovych uładaŭ.
Niekatoryja apazicyjnyja kandydaty pieramahli ŭ dzień hałasavańnia, ale adkidvalisia nazad pa vynikach daterminovaha.
Chto byŭ ŭ lidarach? Illa Dabratvor atrymaŭ 19,3%, ale ŭ jaho byŭ tolki adzin supiernik — ataman Ułachovič.
Pa Kobrynskaj akruzie Alaksandru Miechu dali 17,2%, a ŭ Andreja Dźmitryjeva ŭ Dziaržynsku 15,5%.
U kiraŭnicy sacył-demakrataŭ Iryny Vieštard 13,2%.
Słonimski doktar Ivan Šeha atrymaŭ 13,3%, a ŭ Alaksandra Masiuka pa toj ža akruzie 10,8%.
12,2% dali «zialonamu» Juryju Hłušakovu, a sacyjał-demakratam Hańnie Kanius i Iharu Masłoŭskamu na susiednich bieraściejskich akruhach — raŭniutka pa 11,1% kožnamu.
U Iny Maniankovaj z Rečycy 10,9%.
U Leanida Dubanosava ŭ Łunincy aficyjnyja 10,6%.
U Andreja Jurkova pa Horackaj akruzie — roŭna 10%.
U Minsku najbolšuju padtrymku mieli Uładzimir Navasiad (9,2%), Pavieł Stefanovič, toj samy, za marychuanu (8,3%) i Juraś Mielaškievič (7,1%).
Łohicy takija ličby nie paddajucca. Zatoje vidavočna demanstratyŭnaje staŭleńnie ŭłady da niekatorych kandydataŭ.
Juryj Chaščavacki atrymaŭ nibyta 0,4% hałasoŭ — mienš za ŭsich u Biełarusi! Prykładna stolki ž u Alesia Michaleviča (0,5%).
Minimalnyja ličby atrymali chryścijanskija demakraty. Jarkaha biznesmiena-BNFaŭca Vasila Astroŭskaha pastavili na akruzie na apošniaje miesca z 2%.
Zatoje absalutny pieramožca — śpikier Pałaty pradstaŭnikoŭ Uładzimir Andrejčanka. U Dokšyckaj akruzie jon atrymaŭ 86,8% hałasoŭ!
Kamientary