Zakon padkraŭsia niezaŭvažna

Pałata pradstaŭnikoŭ pryniała ŭ druhim čytańni prajekt zakona «Ab srodkach masavaj infarmacyi». «Za» vykazalisia 96 parłamientaroŭ, «suprać» — 2.

Jak zajaviŭ staršynia Kamisii pa pravach čałavieka, nacyjanalnych dačynieńniach i ŚMI Juryj Kułakoŭski, u novym varyjancie zakonaprajekta ŭličanyja prapanovy redakcyj haziet «SB. Biełaruś siehodnia» («Sovietskaja Biełoruśsija») i «Ekonomičieskaja hazieta», HA «Biełaruskaja asacyjacyja žurnalistaŭ» i Biuro pradstaŭnika pa svabodzie ŚMI ABSIE. Sp. Kułakoŭski pieraličyŭ niekatoryja dapaŭnieńni ŭ zakonaprajekt, uniesienyja da druhoha čytańnia.

U pryvatnaści, jon zajaviŭ pra ŭličanuju prapanovu HA «BAŽ» adnosna pracy karespandenckich punktaŭ: u pryniataj redakcyi karespandencki punkt — heta adasoblenaje padraździaleńnie jurydyčnaj asoby, a nie pradstaŭnictva, jak było ŭ pieršym varyjancie dakumienta, — pieradaje Radyjo «Svaboda».

Peŭnyja papraŭki byli ŭniesienyja ŭ pałažeńni ab pierarehistracyi ŚMI. U papiarednim varyjancie zakonaprajekta pry źmienie jurydyčnaha adrasu ŚMI abaviazkova pavinna było prachodzić pierarehistracyju. Ciapier dastatkova budzie paviedamić źmienu adrasu rehistrujučamu orhanu.

Na prapanovu BAŽ vyznačany termin vyrašeńnia kanfliktaŭ pamiž ŚMI i ŭładaj — nie paźniej jak praz 3 miesiacy ad dnia jaje ŭźniknieńnia. Raniej hety termin nie vyznačaŭsia zusim.

Pa prapanovie Biuro ABSIE ŭ novym varyjancie zakonaprajekta havorycca, što ŚMI nie niasie adkaznaści za infarmacyju, jakaja vychodzić u efir biez papiaredniaha zapisu, — paviedamiła «Svaboda».

«Intierfaks‑Zapad» źviarnuŭ uvahu na niekatoryja inšyja novaŭviadzieńni, pieraličanyja Ju. Kułakoŭskim. Pavodle zakonaprajekta, u krainie pavinna być stvorana kaardynacyjnaja rada z pradstaŭnikoŭ dziaržaŭnych orhanaŭ, hramadskich abjadnańniaŭ, ŚMI. Pałažeńnie pra radu i paradak jaje pracy budzie vyznačać nie Ministerstva infarmacyi, jak toje vynikała ź pieršaha varyjantu zakonaprajektu, a Saviet ministraŭ.

U druhim čytańni z dakumienta vyklučana patrabavańnie ab niedapuščeńni skažeńnia ahulnapryniatych norm movy, «tamu što niama takich norm», — paviedamiŭ Ju. Kułakoŭski. Zamiest hetaha ŭniesiena patrabavańnie ab niedapuščeńni vykarystańnia niecenzurnych słoŭ i vyrazaŭ.

Juryj Kułakoŭski zapeŭniŭ, što «prajekt zakona rehuluje tolki dziejnaść interniet‑anałahaŭ ŚMI». «Jany pavinnyja adpaviadać svaim drukavanym viersijam, za tym vyklučeńniem, što im nie treba prachodzić pierarehistracyju».

Na pytańnie žurnalistaŭ pra toje, jak damahčysia poŭnaj adpaviednaści pamiž drukavanymi ŚMI i ich intierniet‑viersijami albo intierniet‑viersijami teleefiraŭ, deputat nie zmoh adkazać.

Miž tym, pa infarmacyi presavaj słužby HA «BAŽ», śpiecyjalisty Nacyjanalnaha centru zakanadaŭstva i pravavych daśledvańniaŭ pry Administracyi prezidenta, jakim deputaty vyrašyli nakiravać zakonaprajekt na ekśpiertyzu 20 červienia, nie zrabili pa im nivodnaj zaŭvahi i nie znajšli nijakich niedakładnaściaŭ u jaho tekście. Pra heta pres‑słužbie BAŽ paviedamiŭ načalnik upraŭleńnia kanstytucyjnaha zakanadaŭstva centru Ihar Hałubicki.

Pavodle słoŭ Ihara Hałubickaha, terminovaja ekśpiertyza zakonaprajekta — vymušanaja nieabchodnaść. «Heta zdarajecca ŭ vypadkach, kali Saviet Ministraŭ vynosić na razhlad zakon i jon ža rekamienduje termin dla jaho ekśpiertyzy. Tut, jak vy razumiejecie, nijakija ahulnyja terminy — ŭ dva tydni ci navat miesiac — nie pracujuć», — patłumačyŭ Ihar Hałubicki.

• 0
• 0
• 0
• 0
• 0
• 0
• 0
• 0