Pradstaŭnik apazicyjnych kamunistaŭ: «BNR — antynacyjanalny i antybiełaruski prajekt»

22 sakavika ŭ Minsku prajšoŭ kruhły stoł na temu «100 hadoŭ BNR: u fokusie levych». Źviartaje na siabie ŭvahu dakład maładoha kamunista Paŭła Kataržeŭskaha, jaki pradstaŭlaje partyju Siarhieja Kalakina «Spraviadlivy śviet». Dakład maje pravakacyjnuju nazvu «BNR jak antynacyjanalny prajekt».

Pavialičyć

Najpierš Kataržeŭski aburajecca, što dziaržava nadała śviatkavańniu 100-hodździa BNR našmat bolej uvahi, čym 100-hodździu Kastryčnickaj revalucyi. «U adroźnieńnie ad BNR, całkam było praihnaravana 100-hodździe Piatra Mašerva, pry hetym Łukašenka siabie nazyvaje «savieckim čałaviekam».

Małady kamunist źviartaje ŭvahu, što biez Kastryčnickaj revalucyi, jakuju tak «nienavidziać apałahiety BNR», nie mahło b adbycca nijakaha abviaščeńnia niezaležnaści. «Uładzimir Iljič Lenin byŭ, mahčyma, pieršym palitykam, jaki zajaviŭ ab idei niezaležnaj Biełarusi ŭ artykule «Ci ŭtrymajuć balšaviki dziaržaŭnuju ŭładu?» ŭ vieraśni 1917 hoda», — piša Kataržeŭski.

Chłopiec miarkuje, što ludzi, jakija abviaščali niezaležnaść BNR nie byli nijakimi «sacyjalistami». «Navat Biełaruskaja Sacyjalistyčnaja Hramada (BSH) vystupała tolki za bolšuju aŭtanomiju Biełarusi ŭ składzie Rasii, a Lenin kazaŭ ab poŭnaj svabodzie Biełarusi».

Kataržeŭski miarkuje, što BNR ad samaha pačatku było «miortanarodžanym prajektam». Dalej kamunist piša pra toje, što ŭłady BNR isnavali tolki ŭ ciesnym kantakcie ź niamieckimi akupantami.

«BNR akazałasia hłyboka antynacyjanalnym i antybiełaruskim prajektam, dyskredytujučy samu ideju biełaruskaj dziaržaŭnaści i pryraŭnoŭvajučy jaje da kałabaracyjanizmu», — ličyć Pavieł Kataržeŭski.

Pieršaj biełaruskaj dziaržavaj pradstaŭnik «Spraviadlivaha śvietu» nazyvaje BSSR, jakaja była abvieščana 1 studzienia 1919 hoda.

Paŭłu Kataržeŭskamu 22 hady, jon pracuje ŭ «Burhier-Kinhu». Na fotazdymkach Ukantakcie bačna, što braŭ udzieł u ekałahičnych i anarchisckich arhanizacyjach. Šmat vykazvaje salidarnaść z aryštavanym anarchistam Źmitrom Palijenkam.

Kataržeŭski nastupnymi słovami vinšavaŭ z 100-hodździem Kastryčnickaj revalucyi: «I nijakija Kieranskija, Puciny, Łukašenki, Nazarbajevy i im padobnyja nie zmohuć spynić koła historyi i śvitanak hramadstva svabody, spraviadlivaści i roŭnaści, jak by im hetaha ni chaciełasia».

Biełaruś nazyvaje «sumieśsiu cyrku, kancłahiera i psichbalnicy». Stalinskija mietady kiravańnia asudžaje. Žanaty z ukrainskaj kamunistkaj Valancinaj Sienčanka.

• 0
• 0
• 0
• 0
• 0
• 0
• 0
• 0