Ministr zamiežnych spraŭ Uładzimir Makiej u hutarcy z žurnalistami vykazaŭ pazicyju Biełarusi nakont situacyi, jakaja skłałasia vakoł padziej u Kierčanskim pralivie, piša BiełTA.
Pa słovach ministra, toje, što zaraz adbyvajecca ŭ rajonie Kierčanskaha praliva, paćviardžaje aktualnaść i realistyčnaść tych papiaredžańniaŭ, jakija nieadnarazova vykazvaŭ Alaksandr Łukašenka. «Adnosna taho, što my pastupova spaŭzajem da prorvy vialikaha kanfliktu. Apošni raz pra heta kazałasia na sustrečy Asnoŭnaj hrupy Miunchienskaj kanfierencyi pa biaśpiecy, — skazaŭ jon. — Jak my ŭsprymajem heta? My znachodzimsia zusim pobač. I my i apasrodkavana, i niepasredna adčuvajem na sabie nastupstvy hetaj kanfrantacyi».
«My, viadoma, chacieli b, kab nie było zroblena nijakich krokaŭ, jakija pryviali b da dalejšaha rostu napružanaści ŭ našym rehijonie. Bo heta zdolna akazać upłyŭ nie tolki na rehijanalnuju, ale i na mižnarodnuju biaśpieku ŭ cełym. My pierakananyja, što baki kanfliktu razumiejuć svaju adkaznaść za situacyju ŭ rehijonie, za rehijanalnuju biaśpieku», — zajaviŭ kiraŭnik biełaruskaha zamiežnapalityčnaha viedamstva.
Jon padkreśliŭ, što taksama nie chaciełasia b, kab i z boku źniešnich hulcoŭ hučali niejkija emacyjnyja zajavy, jakija ŭ kančatkovym vyniku pryviaduć tolki da dalejšaha rostu napružanaści.
«My zaŭsiody kazali pra toje, i heta nieadnarazova padkreślivaŭ kiraŭnik biełaruskaj dziaržavy, što Biełaruś hatova ŭnieści svoj układ, kali heta budzie prymalna adpaviednym palityčnym hulcam, va ŭrehulavańnie situacyi i razradki toj napružanaści, jakaja siońnia, na žal, prysutničaje ŭ našym rehijonie», — skazaŭ Uładzimir Makiej.
«My adsočvali zajavy, jakija byli zroblenyja i adnym, i druhim bokam. Ale pramych kantaktaŭ nie było. Viadoma, nam važna było b atrymać i ad adnaho, i ad druhoha boku abjektyŭnuju infarmacyju dla taho, kab mieć svoj realny analiz situacyi, źviazanaj z hetym incydentam», — dadaŭ ministr.
Kamientary