Karanavirus: pamior 39-hadovy vałancior PEN-centra. Siamji z dvuma dziećmi źbirajuć dapamohu
39-hadovy minčuk Siarhiej Kułak pamior 6 červienia ŭ balnicy. Siamja i siabry mužčyny miarkujuć, što «karonu» jon padchapiŭ u miedycynskaj ustanovie.
«Jon zmahaŭsia z raśsiejanym sklerozam, uparta damahaŭsia ŭdziełu ŭ ekśpierymientalnych prahramach lačeńnia, razumieŭ, što zdarovym užo nie stanie, ale vielmi chacieŭ chacia b damahčysia remisii i jašče krychu pažyć. Pažyć — aznačała dla jaho mahčymaść pracavać, kab zabiaśpiečyć dźviuch maleńkich dačok žytłom: vypłacić kredyt za adnapakajovuju kvateru, jakuju nabyli ŭ kredyt niekalki miesiacaŭ tamu i ŭ jakoj žyli ŭčatyroch. Najmałodšaj Lizie — 1,5, Naści — 5, žonka ŭ dekrecie», — raspaviała Taćciana Niadbaj, pieršaja namieśnica staršyni biełaruskaha PEN-centra i blizkaja znajomaja Siarhieja.
Niadbaj kaža, što Siarhiej Kułak niaredka dapamahaŭ PENu, kali ŭźnikali prablemy z kampjutarami.
«U pačatku maja jamu stała kiepska. Siarhiej dystancyjna kansultavaŭsia z daktarami, pajechać u balnicu nie moh — daktary sami kazali, što jon, najchutčej, stanie kantaktam pieršaha ŭzroŭniu, a ŭ situacyi Siarhieja heta było niebiaśpiečna, — tłumačyć Taćciana Niadbaj. — Ale kali jamu stała zusim błaha, vyklikali chutkuju. Akazałasia, što ŭ Siarhieja zaškalvaje cukar, to-bok jon mieŭ dyjabiet, pra jaki i sam nie viedaŭ».
10 maja Siarhieja pakłali ŭ reanimacyju. Zrabili test na «karonu» — jon byŭ pazityŭnym.
Ciapier blizkija mužčyny miarkujuć, što jon zaraziŭsia ci to ad daktaroŭ chutkaj, ci to ŭ balnicy. Bo doma ŭsie vielmi zaścierahalisia, viedajučy prablemy sa zdaroŭjem Siarhieja. Da taho ž, žoncy i dzieciam taksama zrabili testy na «karonu» — va ŭsich admoŭnyja.
«Kali ŭ Siarhieja vyjavili virus, to pieraviali ŭ «karanavirusnuju» reanimacyju. Zatym dvuchbakovaja pnieŭmanija, ŠVŁ, karotkaje palapšeńnie i — usio… «Što ž vy chočacie, u jaho stolki spadarožnaha», — razvodziać rukami lekary, jakija, zrešty, zrabili ŭsio mahčymaje», — kaža Niadbaj.
Pachavajuć Siarhieja Kułaka 9 červienia.
Taćciana Niadbaj arhanizavała zbor srodkaŭ siamji Siarhieja. Dapamahčy možna pieraličyŭšy hrošy na płatformie Mołamoła.
Ciapier čytajuć
Uvodziać adkaznaść za prapahandu homaseksualnaści, biaździetnaści, a taksama za niezakonnaje pradstaŭleńnie Biełarusi na mižnarodnaj arenie3
Kamientary