Da haładoŭki ŭ padtrymku źniavolenych Mikałaja Aŭtuchoviča i jaho paplečnikaŭ dałučyŭsia Aleh Ałkajeŭ, były kiraŭnik SIZA ŭ Miensku, tak zvanaj Vaładarki, dzie haładaje zaraz Aŭtuchovič.
Pałkoŭnik milicyi Ałkajeŭ pa palityčnych matyvach pakinuŭ Biełaruś i žyvie zaraz u Niamieččynie. Niadaŭna jon vydaŭ knihu «Rasstrelnaja kamanda», dzie pryadkryŭ tajny biełaruskaj turmy i padaŭ svaje versii palityčnych źniknieńniaŭ u krainie. Raniej Ałkajeŭ i jaho syn Viačasłaŭ dałučalisia da haładoŭki za vyzvaleńnie Alaksandra Kazulina.
Jak paviedamlaje «Małady front», haładoŭku salidarnaści sa źniavolenymi vaŭkavyskimi pradprymalnikami z Francyi taksama padtrymaŭ hramadzki aktyvist Ihar Kisiel. Pavodle infarmacyi Siarhieja Skrabca, da akcyi dałučyŭsia i apazycyjny aktyvist Siarhiej Antošankaŭ. Učora ab dałučeńni da «chatniaj» haładoŭki zajavili taksama hramadzkaja aktyvistka Marjana Hruździłovič i siabra BCHD Źmicier Butenka. Siońnia na Siadzibu BNF dla ŭdziełu ŭ biestermnovaj haładoŭcy pryjazdžajuć salihorski maładafrontaviec Hleb Snorkin i moładzievaja aktyvistka Iryna Hubskaja.
Pavodle pres‑słužby «Maładoha frontu», u haładoŭcy salidarnaści ŭžo prymaje ŭdzieł 20 čałaviek.
Jana pačałasia 4 traŭnia ź inicyjatyvy «Maładoha Frontu» i byłych palitviaźniaŭ. Metaju haładoŭki źjaŭlajecca nieadkładnaje vyzvaleńnie źniavolenych pradprymalnikaŭ Aŭtuchoviča, Lavonava i Asipienki.
Sam Aŭtuchovič haładaje ŭžo ad 16 krasavika. Jon pratestuje suprać biespadstaŭnych, na jaho dumku, abvinavačańniaŭ u padrychtoŭcy ŭzbrojenaha napadu i patrabuje chutčejšaha zaviaršeńnia śledztva na voli, a taksama spraviadlivaha sudu.
«Dyk dadomu zabiary ałkaša abascanaha i vychodžvaj». Małady zahadčyk adździaleńnia balnicy nie strymlivaje siabie ŭ vyrazach u sacsietkach24
Kamientary