Brytanskija ŭłady ŭsypili alpaku, niahledziačy na tysiačy prośbaŭ ab pamiłavańni i pratesty
Alpaku Džeranima, čyje testy dvojčy pakazali stanoŭčy vynik na suchoty bujnoj rahataj žyvioły, usio ž taki ŭsypili, niahledziačy na praciahłuju baraćbu jaje haspadyni za vyratavańnie žyvioły i pietycyju, pad jakoj padpisalisia bolš za sotniu tysiač brytancaŭ.
U aŭtorak supracoŭniki Departamienta charčavańnia, navakolnaha asiarodździa i sielskich rajonaŭ pryjechali na fiermu ŭ Vikvary, niepadalok ad Brystala, i zabrali Džeranima, paviedamlaje Bi-bi-si.
Supracoŭniki Departamienta ŭ achoŭnych sinich kaściumach i maskach prybyli na fiermu ŭ supravadžeńni palicyi.
Paśla taho jak Džeranima vyvieli sa stojła i pahruzili ŭ trejler, jaki zatym źjechaŭ pad kanvojem palicyi, pradstaŭnik departamienta paćvierdziŭ pratestoŭcam i žurnalistam, što sudovy ordar na zabojstva alpaka byŭ vykanany.
«Mnie absalutna brydki hety ŭrad. Heta varvarskija dziejańni. Heta hańba», — skazała haspadynia Džeranima Chielen Makdonald, dadaŭšy, što jana nie atrymlivała papiaredžańnia, što supracoŭniki Departamienta pryjeduć pa alpaka ŭ aŭtorak.
Chielen Makdonald, jakaja praviezła alpaku z Novaj Ziełandyi ŭ 2018 hodzie, niekalki razoŭ asprečvała vyniki analizaŭ i padała niekalki pazovaŭ u Vysoki sud, kab vyratavać hadavanca, pakazvajučy na toje, što Džeranima žyvie na jaje fiermie biez kantaktu ź inšymi žyviołami i nie pradstaŭlaje ni dla kaho pahrozy.
Jana ličyć, što ŭłady Vialikabrytanii dziejničali niesumlenna i praihnaravali jaje pastajannyja zakliki da kanstruktyŭnaha dyjałohu.
Abaroncy Džeranima navat raźbili łahier na fiermie Chielen, kab pasprabavać pieraškodzić zabrać alpaka.
Niekatoryja sprabavali ŭhavaryć palicejskich i supracoŭnikaŭ Departamienta pakinuć žyviołu ŭ spakoi, a adna žančyna navat była nienadoŭha zatrymanaja paśla taho, jak abliła palicejskich z vadzianoha pistaleta, ale ŭ vyniku jaje adpuścili.
Kamientary