Što pahladzieć. «Prydumlajučy Hannu» — sieryjał pra machlarku, jakoj niemahčyma nie začaravacca

Nichto dakładna nie viedaje, chto takaja Hanna. Kamuści jana viadomaja jak Hanna Dełvi, bahataja naślednica z Hiermanii. Ambicyjoznaja dziaŭčyna ź biezdakornym harderobam, jakaja maryć stvaryć svoj pryvatny kłub i fond dla mastakoŭ.

Ale raptoŭna mahija razburajecca. Akazvajecca, što bahataj naślednicaj siabie nazyvała Hanna Vadzimaŭna Sarokina, emihrantka z Rasii. Ciapier jaje čakaje sudovaje rasśledavańnie i, mahčyma, turma, bo ŭvieś jaje šykoŭny ład žyćcia apłačvali ńju-jorkskija bahaciei, što ličyli Hannu roŭnaj siabie. Vynikovyja abvinavačvańni da dziaŭčyny — kradziež u vialikim pamiery i machlarstva.

Kim treba być, kab ašukać mocnych hetaha śvietu na sotni tysiač dalaraŭ? Bo mienavita stolki — 275 tysiač dalaraŭ — skłała, pa mierkavańniach amierykanskaj prakuratury, vynikovaja suma kradziažu, ździejśnienaha Hannaj.

Sieryjał «Prydumlajučy Hannu» źniali na bazie realnaj historyi. Artykuł pra machlarku napisała žurnalistka New York Magazine Džesika Preśler.

Kab nabyć pravy na ekranizacyju hetaj historyi, stryminhavaja kampanija Netflix zapłaciła samoj Hańnie Sarokinaj 320 tysiač dalaraŭ. Ź ich 198 tysiač machlarka patraciła na vypłatu kampiensacyj achviaram, astatniaje pajšło na sudovyja vydatki.

Sud, darečy, skončyŭsia nie na karyść Hanny — jana akazałasia ŭ turmie.

U Netflix atrymalisia 9 sieryj, na praciahu jakich žurnalistka Vivian Kient (jaje pratatypam jakraz była Preśler) sprabuje razhadać historyju Hanny. Čamu ŭ 21 stahodździ, kali ŭsiu infarmacyju možna pravieryć u internecie, nievierahodna bahatyja ludzi pavieryli prostym raskazam pra zamožnuju siamju? Što za talenty dazvolili Hańnie tak daloka prasunucca ŭ jaje afierach? I, narešcie, navošta joj było heta ŭsio?

Kab znajści adkazy, Kient šmat razoŭ sustrakajecca z Hannaj i jaje znajomymi pa minułym bahatym žyćci. Znajści kluč da serca machlarki niaprosta, ale Kient padkazvajuć — Hanna vielmi choča słavy. A chto lepš dapamoža hetuju słavu atrymać, kali nie vopytnaja reparciorka?

Sproby razhadać sakret Hanny Dełvi zavodziać Vivian navat u Hiermaniju — miesca, dzie žyła Sarokina da pierajezdu ŭ ZŠA. Tam Kient sustrakajecca z baćkam Hanny, i jon pramaŭlaje frazu, jakaja, zdajecca, cudoŭna charaktaryzuje mety jaho dački: «U Maskvie kažuć: navošta źbirać na čorny dzień, lepiej kupić tufli Manolo Blahnik. Ź imi luby dzień stanie śviatlejšym».

Rejtynhi na vialikich suśvietnych resursach

IMDB — 6,9/10

Rotten Tomatoes — 63%

Što pahladzieć. «Ryčar» — kryminalny sieryjał, ad jakoha navat krytyki ŭ zachapleńni

Film tydnia: «Kamon Kamon». Kranalnaja čorna-biełaja drama z hienijalnym Chaakinam Fieniksam

• 0
• 0
• 0
• 0
• 0
• 0
• 1
• 0