Rasijskaja armija akazałasia niehatovaj da marazoŭ va Ukrainie, sałdaty pakutujuć ad abmaražeńnia noh
Słužba biaśpieki Ukrainy apublikavała zapisy prasłuchoŭki pieramovaŭ rasijskich vajskoŭcaŭ. Siarod ich jość razmova, dzie adzin z surazmoŭcaŭ raspaviadaje, što pałova jaho bajcoŭ, jakija vajujuć pad Mikałajevam, pakutujuć ad abmaražeńnia noh.
Pra takuju prablemu kazali i karystalniki Tvitara z krynicami na Danbasie, i navat pradstaŭniki Pientahona. Fihurant prasłuchoŭki taksama skardzicca, što bajcam davodzicca spać u akopach, bo ŭ ich niama ni namiotaŭ, ni piečak-buržujek, paviedamiła SIT.
Krynica, znajomaja ź situacyjaj na inšym kirunku ŭvarvańnia, paćvierdziła hetuju infarmacyju, dadaŭšy, što ŭ adnym sa złučeńniaŭ namiotami była zabiaśpiečanaja tolki adna bataljona-taktyčnaja hrupa, a zimovaje abmundziravańnie mieli ŭsiaho 20% składu, pryčym časta nabytaje samimi kantraktnikami za svoj košt. Pra niedachop zimovaha abmundziravańnia jak pryčynu abmaražeńniaŭ kazaŭ pradstaŭnik Pientahona. Imavierna, što pryčyna — instytucyjanalnaja karupcyja ŭ rasijskim vojsku.
Razam z tym mnohija zasumniavalisia, što va Ukrainie viasnoj možna atrymać abmaražeńnie. Adnak źviestki pra nadvorje ŭ Mikałajevie pakazvajuć, što ŭ sakaviku tempieratura rehularna apuskałasia istotna nižej za nul. Heta było całkam pradkazalna, bo jašče ŭ studzieni ŭkrainskija sinoptyki abiacali anamalna chałodnuju viasnu.
Mahčyma, rasijskija štabisty, jakija adkazvali za płanavańnie apieracyi, albo raźličvali skončyć jaje ŭ ličanyja dni, abo nie ŭličyli mahčymaj anamalii nadvorja, abo pamyłkova ličyli, što rasijskija vojski ŭkamplektavanyja zimovym abmundziravańniem.
U takich umovach ułady rasijskich rehijonaŭ, naprykład Vałhahradskaj vobłaści, abviaścili navat akcyi pa zbory ciopłych rečaŭ dla vajskoŭcaŭ, jakija vajujuć va Ukrainie.
Kamientary