«Vyjezd supiarečyć intaresam nacyjanalnaj biaśpieki RB». Papraŭki ŭ zakon chutka abmiažujuć vyjezd z krainy
Budzie źmienieny zakon «Ab paradku vyjezdu z Respubliki Biełaruś i ŭjezdu ŭ Respubliku Biełaruś hramadzian Respubliki Biełaruś». Adpaviedny zakonaprajekt byŭ uniesieny ŭ parłamient 23 červienia ŭradam. U śpis dakumientaŭ, na padstavie jakich dazvoleny vyjezd abo ŭjezd u Biełaruś, narešcie aficyjna ŭniasuć bijamietryčny pašpart. Ale heta nie hałoŭnyja źmieny prajekta zakona, paviedamlaje «Zierkało».
![](http://nashaniva.com/img/w840d4webp1/photos/stock/img_1115-9hyl6.jpg.webp)
Zabarona dla «palityčnych administratyŭščykaŭ» i z dazvołu KDB
Padstavy dla zabarony na vyjezd papoŭnilisia niekalkimi novymi punktami, ale važnyja dva ź ich.
KDB zmoža abmiežavać vyjezd nie tolki dla tych, chto znachodzicca na prafiłaktyčnym uliku ŭ orhanach dziaržaŭnaj biaśpieki, ale i tym, čyj «vyjezd supiarečyć intaresam nacyjanalnaj biaśpieki Respubliki Biełaruś».
Abmiežavańnie moža ŭvodzicca na termin da paŭhoda. Jakija hramadzianie i na jakich padstavach buduć traplać u hetuju katehoryju — nie paviedamlajecca.
Vyjezd taksama zabaroniać tym asobam, «u dačynieńni da jakoha viadziecca administracyjny praces za ŭčynieńnie administracyjnych pravaparušeńniaŭ suprać paradku kiravańnia — u metach zabieśpiačeńnia vykanańnia pastanovy sudździ ab nakładańni administracyjnaha spahnańnia ŭ vyhladzie štrafu».
Raniej abvinavačanych ź Biełarusi taksama nie vypuskali, ale heta tyčyłasia tych, chto ŭžo atrymaŭ štraf i nie apłaciŭ jaho. Ciapier ža vyjezd zabaronieny i tym, u dačynieńni da kaho viadziecca administracyjny praces, a rašeńnie sudom pakul jašče nie pryniataje.
U «pravaparušeńni suprać paradku kiravańnia» ŭvachodziać tak dobra znajomyja biełarusam «palityčnyja» artykuły KaAP: niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni joj słužbovych paŭnamoctvaŭ, parušeńnie paradku arhanizacyi abo praviadzieńnia masavych mierapryjemstvaŭ i hetak dalej.
Siłavikam (i navat ratavalnikam) — tolki z dazvołu kiraŭnictva, bijamietryčnyja pašparty — zdać.
Supracoŭnikam siłavych orhanaŭ možna budzie vyjechać za miežy Biełarusi tolki pa ŭzhadnieńni z kiraŭnictvam. Hetaje sakretnaje praviła niekalki hadoŭ dziejničała i raniej: vajskoŭcam, supracoŭnikam milicyi abo Śledčaha kamiteta nastojliva rekamiendavałasia vybirać dla adpačynku tolki «družalubnyja» krainy — naprykład, Turcyju, Jehipiet, Rasiju.
U zakonaprajekcie hetaja norma — vyjezd pa ŭzhadnieńni z kiraŭnictvam — uzakonienaja i nie tolki dla supracoŭnikaŭ u pahonach.
Jana budzie tyčycca vajskoŭcaŭ, supracoŭnikaŭ, rabotnikaŭ i asob hramadzianskaha piersanału voinskich farmavańniaŭ i vajenizavanych arhanizacyj Biełarusi, a mienavita:
Uzbrojenych sił Respubliki Biełaruś;
orhanaŭ pahraničnaj słužby;
unutranych vojskaŭ Ministerstva ŭnutranych spraŭ;
orhanaŭ dziaržaŭnaj biaśpieki;
transpartnych vojskaŭ;
Słužby biaśpieki prezidenta Respubliki Biełaruś;
Apieratyŭna-analityčnaha centra pry prezidencie Respubliki Biełaruś;
Śledčaha kamiteta;
Dziaržaŭnaha kamiteta sudovych ekśpiertyz;
orhanaŭ unutranych spraŭ;
orhanaŭ finansavych rasśledavańniaŭ Kamiteta dziaržaŭnaha kantrolu;
orhanaŭ i padraździaleńniaŭ pa nadzvyčajnych situacyjach.
Kiraŭnictva maje prava im admović u vyjeździe z krainy «ŭ metach zabieśpiačeńnia intaresaŭ nacyjanalnaj biaśpieki da spynieńnia abstavinaŭ, jakija pieraškadžajuć ich vyjezdu».
Akramia taho, u vypadku najaŭnaści ŭ hetaj katehoryi asob bijamietryčnaha pašparta, na čas słužby jany abaviazanyja pieradać jaho ŭ kadravuju słužbu svajoj arhanizacyi.
Što ž tyčycca dziaržsłužačych, to paradak ich vyjezdu ź Biełarusi budzie vyznačać urad.
Zabarony majuć być uviedzienyja ŭvosień
Zakonaprajekt pastupiŭ u parłamient. Jaho pavinny buduć razhledzieć na vosieńskaj siesii, jakaja startuje ŭ vieraśni.
Paradak pryniaćcia zakonaprajektaŭ u nas taki — u dvuch čytańniach jaho pavinna pryniać Pałata pradstaŭnikoŭ, zatym adobryć Saviet Respubliki — jak pakazvaje praktyka, heta možna zrabić za adzin dzień. Zatym jaho padpisvaje Alaksandr Łukašenka, paśla čaho jon atrymlivaje status zakona i jaho aficyjna publikujuć na Nacyjanalnym pravavym internet-partale.
Paśla hetaha zabarona na vyjezd supracoŭnikaŭ siłavych viedamstvaŭ biez dazvołu ŭstupaje ŭ siłu praz dva miesiacy, astatnija źmieny — adrazu ž paśla apublikavańnia.
Kamientary
Zaprietiť mohli vsiehda. Smysł etoho bumahomaratielstva....