Halivudskaja «navatarskaja» ŠI-prapanova dla akcioraŭ hučyć jak scenar dla fantastyčnaha filma

Nahadajem, što SAG-AFTRA (amierykanski prafsajuz, jaki pradstaŭlaje kala 160 000 miedyjaprafiesijanałaŭ pa ŭsim śviecie) 13 lipienia abviaściŭ pra pačatak najbujniejšaha strajku akcioraŭ u historyi Halivuda. Heta adbyłosia paśla taho, jak pieramovy pamiž hildyjaj akcioraŭ i Aljansam kina— i televizijnych pradziusaraŭ skončylisia ničym.

Padčas abjavy SAG-AFTRA ab zabastoŭcy ŭpieršyniu była ahučana i tak zvanaja ŠI-prapanova, vysunutaja Aljansam kina- i televizijnych pradziusaraŭ. Prapanova hetaja praduhledžvaje skanavańnie akcioraŭ druhoha płanu dla vykarystańnia nie tolki ŭ adnym prajekcie, ale i ŭ lubym inšym prajekcie nazaŭsiody.

Gizmodo pryvodzić słovy adnaho z kiraŭnikoŭ akciorskaha prafsajuza, jaki bolš padrabiazna raskazaŭ, što mienavita prapanavaŭ im Aljans pradziusaraŭ. Tak, Aljans prapanavaŭ, kab akciory druhoha płana (masoŭki) byli adskanavanyja, za što jany atrymali b adnadzionnuju apłatu, a ich kampanija atrymała b pravy na vałodańnie hetaj vyjavaj vykanaŭcy i nieabmiežavanaje ŭ časie vykarystańnie jaje ŭ lubym prajekcie biez dalejšaj zhody i kampiensacyi akcioru.

Takim čynam studyi mahli b zabić adnačasova dvuch zajcaŭ: značna skaracić vydatki na akcioraŭ masoŭki, a taksama być upeŭnienymi ŭ svajoj budučyni ŭ vypadku, kali akcior druhoha płanu paźniej stanie zorkaj. Tady b studyi mieli nieabmiežavanyja mahčymaści z dapamohaj ŠI «sastaryć» užo adskanavanych vykanaŭcaŭ i zrabić ich «zornymi» ŭ novym filmie. Takaja ideja vidavočna mahła b pryvieści da abiasceńvańnia prafiesii akciora.

Takoha rodu inviestycyi ŭ štučny intelekt raspaŭsiudžvajucca ŭ roznych halinach. Praca akcioraŭ, piśmieńnikaŭ i multymiedyjnych mastakoŭ znachodzicca pad pahrozaj z-za nizkaj rentabielnaści, vysokaj prybytkovaści štučnaha intelektu i hienieratyŭnych praduktaŭ. Pakolki da strajku razam z SAG-AFTRA aficyjna dałučajecca i WGA (abjadnańnie amierykanskich prafsajuzaŭ, jakija pradstaŭlajuć piśmieńnikaŭ u kino, telebačańni, radyjo i internet-ŚMI), hetuju zabastoŭku ŭžo nazyvajuć histaryčnaj.

Apošni raz Hildyja kinaakcioraŭ (da jaje źlićcia z Amierykanskaj fiederacyjaj artystaŭ telebačańnia i radyjo) bastavała razam z Hildyjaj piśmieńnikaŭ Amieryki ŭ 1960 hodzie, kali Ronald Rejhan byŭ prezidentam Hildyi. Ciapierašni abjadnany strajk pavinien pakazać, što salidarnaść maje klučavoje značeńnie dla atrymańnia spraviadlivaha kantrakta dla ŭsich rabotnikaŭ haliny.

• 6
• 1
• 3
• 1
• 7