Upieršyniu Ukraina nanosić bolš udaraŭ z dapamohaj bieśpiłotnikaŭ dalokaha radyusu dziejańnia, čym Rasija
Mahčyma, Ukraina moža atrymać pieravahu ŭ stratehičnaj vajnie dalnabojnych bieśpiłotnikaŭ.
![Ukrainskije drony dalnieho diejstvija Ukrainian long-range drones Ukrainskija drony dalniaha dziejańnia](http://nashaniva.com/img/w840d4webp1/photos/z_2024_08/1-ycw6y.jpg.webp)
Jak adznačaje Reuters, pavodle apublikavanych danych, u lipieni Rasija nakiravała na Ukrainu 426 bieśpiłotnikaŭ typu «Šachied». Za toj ža pieryjad Ukraina vypuściła pa Rasii bolš čym 520 dronaŭ. Heta adbyłosia ŭpieršyniu z pačatku vajny.
Mahčyma, zaŭvažaje aŭtar artykuła, Ukraina moža atrymać pieravahu ŭ stratehičnaj vajnie dalnabojnych bieśpiłotnikaŭ, jakija nanosiać značnuju ekanamičnuju škodu naftapierapracoŭčym zavodam i inšym celam.
Choć rakiety važnyja z-za ich razburalnaha dziejańnia, bolšaja častka rasijskaj udarnaj mocy dalokaha dziejańnia zaraz pradstaŭlena ŭ vyhladzie bieśpiłotnikaŭ. Pryčym pieravažna heta BPŁA iranskaj raspracoŭki sieryi Shahed, viadomyja ŭ Rasii jak «Hierań».
Jany prostyja ŭ vytvorčaści i kaštujuć usiaho 20 tysiač dołaraŭ u paraŭnańni ź miljonam dalaraŭ i bolš za rakietu. Akramia nizkaha koštu, hałoŭnaja pieravaha «Šachieda» — dalnaść palotu, jakaja składaje bolš za tysiaču kiłamietraŭ.
Rasija zvyčajna vypuskaje da 30 «Šachiedaŭ» adnačasova. Charakterny huk ich palotu ŭłoŭlivaje tysiača sietkavych mikrafonaŭ, i za niekalki hadzin, pakul tyja dabirajucca da celi, na pazicyi vysoŭvajucca mabilnyja padraździaleńni pa baraćbie z dronami, uzbrojenyja kulamiotami i aŭtamatyčnymi puškami.
![](http://nashaniva.com/img/w732d4webp1/photos/z_2023_07/ached230725-qm009.jpg.webp)
Mnohija «Šachiedy» taksama paražajucca rakietami «ziamla-pavietra», a inšyja źbivajucca z kursu abo padajuć na ziamlu pad uździejańniem śpiecyjalizavanych sistem radyjoelektronnaj baraćby.
Ukraina zvyčajna śćviardžaje, što źbivaje 90% «Šachiedaŭ», a časam i 100%. Pravieryć heta niemahčyma, i vidavočna, što rasijskija bieśpiłotniki ŭsio jašče nanosiać škodu, ale pahroza, zdajecca, nie raście.
Rasija naładziła vytvorčaść «Šachiedaŭ» na hihanckim novym abjekcie ŭ Ałabuzie, na ŭschodzie ad Maskvy. Niahledziačy na toje, što ich dyzajn za apošnija dva hady byŭ źmienieny, techničnyja charaktarystyki zastalisia šmat u čym tyja ž. I siarod dronaŭ dalniaha dziejańnia mienavita «Šachiedy» składajuć pieravažnuju bolšaść, choć isnujuć padobnyja rasijskija raspracoŭki.
Ukraina, u svaju čarhu, raspracavała šyroki śpiektr roznych udarnych dronaŭ dalniaha dziejańnia. Analityki naličyli nie mienš jak 22 roznyja madeli. Pry hetym ich vytvorčaść raście.
Kali ŭ 2023 hodzie ataki byli nievialikimi pa maštabie, to ŭ hetym usio bolš raspaŭsiudžanymi stanoviacca masavyja ataki. Tak u lipieni Ukraina zapuściła bolš za 520 udarnych dronaŭ, što ŭ dva z pałovaj razy bolš, čym u mai i červieni.
Analityki adznačajuć, što adnoj z funkcyj kampanii bieśpiłotnikaŭ Ukrainy źjaŭlajecca stvareńnie dylem dla rasijskich vajskovych płaniroŭščykaŭ. Adviadzieńnie SPA ad linii frontu mahło b dapamahčy abaranić avijabazy, ale pakinuć vojski ŭraźlivymi dla pavietranych atak. Zasiarodžvańnie ŭvahi na avijabazach aznačaje, što žyćciova važnyja naftaschoviščy buduć hareć usio čaściej.
Adnak, jak adznačajecca ŭ artykule, vialikaje pytańnie ŭ tym, kolki ŭdarnych bieśpiłotnikaŭ dalokaha radyusu dziejańnia moža vyrablać Ukraina, i ci źjaŭlajecca lipień usploskam abo tendencyjaj.
Kamientary