U kancy 2022-ha žurnalisty «Našaj Nivy» sabrali top lubimych sieryjałaŭ — bolš za try dziasiatki vielmi roznych prajektaŭ. Ale ž za paŭtara hoda vyjšła jašče niamała cikavaha, dy i nie ŭsio my achapili ŭ pieršym tekście. Tamu prezientujem novy top sieryjałaŭ ad Redakcyi — tut budzie što vybrać.
![](http://nashaniva.com/img/w840d4webp1/photos/z_2024_08/imgonline-com-ua-2to1-e8j0a3xuhp-l5i6y.jpg.webp)
Dramy i kamiedyi
Karona (The Crown)
Sioleta na šostym siezonie skončyŭsia brytanski sieryjał «Karona» — adna z najlepšych dramaŭ apošnich dziesiacihodździaŭ. Histaryčnaja dakładnaść tolki ŭzmacniaje mastackuju kaštoŭnaść sieryjała.
Ciaham 60 sieryj my razam ź siamjoj karalevy Lizaviety II pieražyvajem vykliki jaje vaładarańnia, ale heta karcina nie pra ŭładu — jana pra siamju, doŭh i toje, čym davodzicca dziela ich achviaravać. Kožny z zamknutych u załatoj kletcy siamiejnikaŭ karalevy raskryvajecca da samaj asnovy. Za hetymi hłybokimi vobrazami stajać jak fajnyja brytanskija akciory, tak i daścipnaja muzyka Marcina Fipsa — bieź jaje mahija «Karony» była b niemahčymaja.
Raspracoŭščyki (Devs)
Mini-sieryjał «Raspracoŭščyki» zakranaje pytańnie miesca čałavieka ŭ śviecie. Lubaja vysokaraźvitaja technałohija nieadroznaja ad mahii, śćviardžaŭ fantast Artur Kłark, ale ci mohuć technałohii zamianić Boha?
Hetym pytańniem dražnić navat nazva sieryjała, Devs — heta «raspracoŭščyki» z anhlijskaj, i Devs — heta «Boh» z łatyni (siońnia Deus, ale litara U uźnikła jak varyjant litary V tolki ŭ XIV stahodździ). Takich adsyłak u sieryjale chapaje. Padziei raźvivajucca imkliva, ale stvaralniki zachavali adčuvańnie raźmieranaści i niaśpiešnaści ŭnutry hiermietyčnaha śvietu, byccam adarvanaha ad realnaści. Historyja, vizualny i muzyčny rad sieryjała začaroŭvać.
Aleniania (Baby Reindeer)
Film, jaki pačynajecca jak trahikamiedyja-fars, zasnavany na realnym vypadku. Heta kinaadaptacyja monaśpiektakla Ryčarda Heda.
Niaŭdačnik-stendapier Doni Dan (jaho hraje sam Ryčard Hed) udzień pracuje ŭ łondanskim bary, dzie jaho pačynaje dastavać dziaŭčyna-stałkier Marta. Prapanova pačastavać dziaŭčynu, u jakoj nie było hrošaj na harbatu (a ceny ŭ Łondanie navat na harbatu — ohoho), skončyłasia nadta dakučlivaj uvahaj. Marta za niekalki miesiacaŭ napisała mužčynie tysiačy paviedamleńniaŭ, pieraśledavała jaho na vulicy i padčas stendapaŭ, zryvała ich.
Vyśvietliłasia, što niekalki hadoŭ tamu jana atrymała turemny termin za pieraśled inšaha mužčyny. Ale i ŭ jaje adnosinach z Danam nie ŭsio tak prosta, jak moža padacca.
Pałavoje vychavańnie (Sex Education)
Sieryjał, jaki doŭha pralažaŭ u śpisie zapasnych, tamu što navošta hladzieć kino pra padletkaŭ, kali tabie nie 16? Treba pryznać, što hetaje mierkavańnie było vielmi i vielmi pamyłkovym. Vostryja pytańni pra seks, stasunki, baćkoŭstva, škołu, siamju, staleńnie, žyćcio na dnie.
Tut sabrana komba dziasiatkaŭ prablem, ź jakimi litaralna kožny kali nie sutykajecca ŭ štodzionnym žyćci, to naziraje zboku. Prahlad moža być u niejkim sensie sieansam psichaterapii i dapamahčy pieraasensavać ułasny dośvied, kab nie dapuścić pamyłak u stasunkach ź blizkimi ŭ budučyni.
Tehieran (Tehran)
Ahientka «Masada» prylataje pad prykryćciom u Tehieran, kab pravieści dyviersiju. Joj treba vyvieści sa stroju supraćpavietranuju abaronu, kab Izrail moh udaryć pa jadziernym reaktary Irana, ale zaduma idzie nie pa płanie.
Dvajnyja ahienty, kachańnie i reŭnaść, raspravy ź lubym, chto moh dapamahać ahientcy «Masada» — usio heta jość u «Tehieranie», izrailskim špijonskim trylery. Napružany siužet trymaje da kanca (u sieryjała dva siezony), i navat tady, kali padajecca, što možna vydychnuć, padkidaje novy siurpryz. Asobnaje zadavalnieńnie — akciory, padabranyja na klučavyja roli.
Pryznačany pierajemnik (Designated Survivor)
Palityčny tryler budzie sapraŭdnaj intelektualnaj asałodaj dla tych, chto cikavicca zakuliśsiem vialikaj palityki. Sieryjał moh by nazyvacca «Vypadkovy prezident», tamu što hałoŭny hieroj Tom Kirkman, jakoha ličyli łuzieram u amierykanskim uradzie, paśla vybuchu Kapitolija i hibieli prezidenta z usimi jahonymi asnoŭnymi pierajemnikami, stanovicca adzinaj alternatyvaj dla krainy.
Stvaralniki sieryjała ŭplali ŭ palityčnyja hulni detektyŭnuju liniju, jakaja moža być jašče cikaviejšaja za asnoŭnuju. Eks-ahientka FBR biarecca rasśledavać spravu vybuchu Kapitolija i ŭ pošukach sapraŭdnych złačyncaŭ rasplataje vialiki kłubok zahadak.
1670
Hety polski satyryčny sieryjał pra šlachtu ad Netflix mnohich skaryŭ. U centry padziej — siamiejstva šlachcica Jana Paŭła Adamčeŭskaha. Jon imkniecca stać vialikim panam, varahuje z susiedam, a jaho darosłyja dzieci tym časam šukajuć svoj šlach u hetym žyćci — ad śviatarstva da zmahańnia za pravy žančyn. Cudoŭnyja kaściumy i jarkija charaktary piersanažaŭ, prypraŭlenyja jakasnym humaram z adsyłkami da sučasnaści, nie daduć zasumavać.
Schovišča (Silo)
Šykoŭnaja antyŭtopija pra žyćcio 10 tysiač čałaviek u hłybokim bunkiery ŭ 144 pavierchi, nieviadoma kali i kim zbudavanym. Kožny, chto tut apynuŭsia, abaviazany prytrymlivacca strohich unutranych pravił. U kožnaha svoj kavałak pracy i svajo miesca ŭ sistemie. Nasielnikaŭ bunkiera pierakonvajuć, što žyćcio za miežami hetaj hłybokaj jamy spyniłasia. Vialikaje panaramnaje akno ź miortvym krajavidam na samym vierchnim paviersie — adzinaja suviaź z vonkavym śvietam.
Sutyknuŭšysia ź niespraviadlivaściu, niekalki žycharoŭ pačynajuć šukać praŭdu i zadavać pytańni. Jak my tut apynulisia? Čamu? Ci sapraŭdy žyćcio za miežami bunkiera spyniłasia? A moža ŭsio heta vialiki padman?
Ekspaty (Expats)
Sieryjał raspaviadaje pra troch žančyn roznych nacyjanalnaściaŭ, jakija volaju losu apynulisia ŭ Hankonhu. Marharet (Nikol Kidman) — łandšaftny dyzajnier, jaki nie maje pracy ŭ Hanhonhu ź jaho ščylnaj zabudovaj i jakaja zajzdrościć siabroŭkam-adnahodkam u ZŠA. Ale ŭ Hankonhu jaje trymaje vialiki zarobak muža i roznyja pluški. 40-hadovaja Chiłary — z bahataj indyjskaj siamji z Łondana, kiruje dyzajnierskim ahienctvam i marna sprabuje z mužam zavieści dzicia. I 20-hadovaja Miersi — amierykanka karejskaha pachodžańnia, jakaja źbiehła ŭ Hankonh ad despatyčnaj maci.
Taksama ŭ mini-sieryjale vypisany vobrazy inšych ekspataŭ: biednych žančyn-filipinak, jakija pracujuć chatnimi haspadyniami ŭ damach Marharet i Chiłary i hadami nie bačać svaich pakinutych na radzimie dziaciej i ŭnukaŭ.
Fantastyka i fentezi
Apošnija z nas (The Last of Us)
Vydatna zrobleny sieryjał, jaki ŭ niečym užo staŭ lehiendarnym. Pa Amierycy, achutanaj zombi-apakalipsisam, jeduć darosły mužčyna i dziaŭčynka-padletak, kab pakłaści kaniec śmiarotnaj pandemii. Siabroŭstva mianiaje ludziej i daje siły vyžyć navat u śviecie zombi, vučać «Apošnija z nas», chacia tut jość, pra što padumać i akramia hetaha.
Dom Cmoka (House of the Dragon)
«Dom Cmoka» ad HBO bolš nahadvaje pastanoŭki šekśpiraŭskich dram i sieryjał «Karona», čym svajho vialikaha papiarednika — «Hulniu tronaŭ». Heta zusim inšy prajekt, niachaj vas nie ŭvodziać u zman znajomyja łakacyi i hroznyja cmoki.
Kanflikt tut najpierš u siamji, siarod blizkich ludziej, jon pavolna vyśpiavaŭ uvieś pieršy siezon, kab strelić u kancy. Matyvy i pryčyny dziejańniaŭ tut važniejšyja za sami dziejańni. U niejki momant stanovicca zrazumiełym, što niama nijakich partyj «zialonych» i «čornych», jość partyja žančyn, jakaja supraćstaić ahresiŭnamu mužčynskamu śvietu, što prahnie zalić Viesteros ułasnaj kryvioju. Dyjałohi piersanažaŭ, siužetnyja akcenty i hulnia akcioraŭ vartyja najvyšejšaj pachvały.
Andar (Andor)
Sieryjał «Andar» — heta prykvieł da filma «Izhoj-adzin», jaki palubiŭsia fanatam Zornych vojnaŭ. Stvaralniki vyrašyli adyści ad kasmaopiery pra «vybranych» sa zvyšnaturalnaj siłaj, a skancentravacca na prostych ludziach u niaprostyja časy ŭmacavańnia Hałaktyčnaj impieryi i zaradžeńnia ruchu paŭstancaŭ.
Hledačy mohuć pabačyć, čym nasamreč žyvie dalokaja-dalokaja hałaktyka, vačyma ambicyjnaha klerka, supracoŭnicy impierskaj śpiecsłužby, handlara antykvaryjatam, sienatarki Mon Motmy i złačynca Kasijana Andara, jakomu daviadziecca pieratvarycca z cynika ŭ hieroja. Mienš śvietłavych miačoŭ, Siły i inšych «vundervaflaŭ», ale bolš intryh, palityki i palityčnych represij.
Kryminał i detektyvy
Pierapoŭnieny pakoj (The Crowded Room)
Tom Chołand («Čałaviek-pavuk») i Amanda Siejfryd («Mama mia!») abjadnalisia ŭ hetaj niečakanaj kryminalnaj dramie pra zabojcu, jakomu pahražaje šmat hadoŭ za kratami. Vyratavać jaho moža tolki psichołah, i inšyja detali vam lepš nie viedać, bo sapsujecie sabie ŭražańnie. U «Pierapoŭnienym pakoi» ŭsio nie toje, čym padajecca, i chacia spačatku siužet moža vyhladać pavolnym, prajavicie ciarpieńnie — sieryjał taho vielmi varty.
Rypli (Ripley)
Historyju abajalnaha złodzieja Toma Rypli šmat chto ekranizavaŭ. Viasnoj 2024-ha vyjšła viersija znakamitaha siužetu ad Netflix, i heta hustoŭny sieryjał nie dla ŭsich ź irłandcam Endru Skotam u hałoŭnaj roli. Vas čakaje ciahučy nuar sa stylovym saŭndtrekam, vytančanaj apieratarskaj pracaj i tonaj minimalizmu — sieryjalnyja bosy redka radujuć nas takoj smakatoj.
Prezumpcyja nievinavataści (Presumed Innocent)
U 1988 hodzie Skot Turaŭ napisaŭ adnajmienny raman, a ŭ 1990-m pa im byŭ źniaty film z Charysanam Fordam u hałoŭnaj roli — namieśnik akruhovaha prakurora ŭ Čykaha Raści Sabič.
Siužet nastupny: žorstka zabivajuć kalehu Sabiča Karalin Palemus, pryčym imitujuć pad zabojstva prastytutki, rasśledavańniem jakoha i zajmałasia Karalin. Sabiču daručajuć rasśledavańnie, ale chutka jaho abvinavačvajuć u zabojstvie: vyśviatlajecca, što Raści i Karalin byli kachankami. Raźviazka siužetu vas ździvić.
Šuhar (Sugar)
Džon Šuhar (Kolin Fareł)— pryvatny detektyŭ, jaki śpiecyjalizujecca na pošuku źnikłych dziaciej i atrymlivaje za heta vialikija hrošy. Da jaho źviartajecca jaho lubimy halivudski kinapradziusar, prosiačy znajści svaju ŭnučku Aliviju. Raniej dziaŭčyna mieła vialikija prablemy z narkotykami, ale stała na šlach vypraŭleńnia.
Šuhar — palihłot, lubić sabak, dapamahaje biazdomnikam. Praŭda, u jaho taksama jość svaje škilety ŭ šafie, a film u kancy zrobić niečakany (abo čakany) pavarot.
Film pastajanna pierabivajecca adsyłkami da filmaŭ «Załatoha vieku Halivudu», demanstrujucca kadry lubimych stužak Džona Šuhara. Scenaryst Mark Pratasievič zrabiŭ niekalki kadraŭ, dzie pakazaŭ vydumanyja filmy, stylizavaŭšy ich pad filmy 1940-1950-ch. Słovam, sieryjał u najlepšych tradycyjach karaloŭ detektyva časoŭ Rejmanda Čandlera i Dešyła Chemieta.
Bierlin (Berlin)
Kali vy hladzieli ispanski sieryjał pra hrandyjoznyja rabavańni «Papiarovy dom», to i «Bierlin» vy dakładna acenicie. Bierlin — mianuška adnaho z hałoŭnych hierojaŭ bandy rabaŭnikoŭ «Papiarovaha domu». U sieryjale jamu dastałasia rola sapraŭdnaha padonka. Ale bližej da finału jahonaja asoba raskryvajecca zusim ź inšaha boku: my bačym jaho samaachviarnym žyćcialubivym čałaviekam, zdolnym na mocnaje kachańnie.
U sieryjale «Bierlin» narešcie my možam zanyrnuć u jahonuju historyju i pabačyć jaho ŭ samym vyjhryšnym śviatle ŭ apoviedzie pra jašče adno vielmi ambicyjnaje i pryhožaje rabavańnie.
Bodkin (Bodkin)
Try čałavieki pryjazdžajuć u irłandski haradok Bodkin, kab rabić kryminalny padkast pra źniknieńnie troch dziaciej na Chełoŭin (irłandcy kažuć Samajn) 20 hadoŭ tamu. Dvoje małych źnikli biasśledna, treci chutka znajšoŭsia, ale ničoha nie pamiataŭ.
Što heta za troica pryjezdžych? Amierykaniec — aŭtar papularnaha padkasta ŭ ZŠA, jaki šukaje svaje irłandskija karani i zachaplajecca ŭsim irłandskim. Topavaja i bieskampramisnaja žurnalistka z «Hardyjan» (aktrysa Šyvan Kalen), jakaja vymušana źbiehčy z Łondana i zalehčy na dno ŭ Bodkinie, bo jaje infarmatar skončyŭ žyćcio samahubstvam i suprać jaje adkryta rasśledavańnie. I maładaja praktykantka, jakaja ŭ prafiesijnym sensie zakachanaja i ŭ padkastera, i ŭ žurnalistku.
Eryk (Eric)
Vinsent (Bieniedykt Kambierbietč) viadomy ŭ Ńju-Jorku 1980-ch lalkavod, aŭtar papularnaha dziciačaha šou, jakoje, praŭda, pačynaje hublać rejtynhi. Vinsent časam vypivaje, pastajanna svarycca z žonkaj, što čuje dzieviacihadovy syn Edhar. Syn raić zrabić jamu novuju lalku, monstra Eryka, ale Vinsent jaho nie čuje.
Adnojčy Edhar pa darozie ŭ škołu źnikaje. Vinsent ličyć, što kali zrobić novuju lalku-monstra Eryka, syn abaviazkova znojdziecca. Adzin sa słohanaŭ filma: «Monstry nie žyvuć pad łožkam, jany žyvuć siarod nas». Ci znojdziecca chłopčyk?
Hid pa zabojstvach dobraj dziaŭčynki (A Good Girl's Guide to Murder)
U cichim anhlijskim haradku žyvie 17-hadovaja školnica Pipa (Ema Majers), jakaja ŭ jakaści vypusknoha prajekta ŭ škole choča raskryć zabojstva piacihadovaj daŭniny.
Tady zahadkavym čynam zahinuła 17-hadovaja Endzi Beł, i hałoŭnym padazravanym staŭ jaje chłopiec Seł Sinhch. Jon pryznaŭsia ŭ zabojstvie pa sms i, nie dačakaŭšysia aryštu, skončyŭ žyćcio samahubstvam. Palicyja i žychary horada ŭpeŭnienyja, što mienavita Seł zabiŭ Endzi. Pipa i brat Seła ŭpeŭnienyja ŭ advarotnym.
Leśvica (Staircase)
Aŭtara vajennych knih i hramadskaha dziejača Majkła Pitersiena (jaho hraje Kolin Fiort) abvinavačvajuć u tym, što jon zabiŭ žonku Ketlin (Toni Kolet) — top-mieniedžarku telekamunikacyjnaj kampanii. Jaje znachodziać mocna źbitaj kala leśvicy.
U siamji piaciora dziaciej. Dvoje synoŭ — dzieci Majkła ad pieršaha šlubu, adna z dačok — dačka Ketlin ad pieršaha šlubu, i dźvie pryjomnyja dački. Adnaho z synoŭ hraje, prabačcie za taŭtałohiju, syn Arnolda Švarceniehiera Patryk. Usia siamja ŭciahnuta ŭ sudovaje raźbiralnictva, jakoje i ŭ realnaj historyi, i ŭ filmie zaciahnułasia na niekalki hadoŭ.
Mejr ź Isttaŭna (Mare of Easttown)
Padziei adbyvajucca ŭ haradku Isttaŭn (Piensilvanija) — heta źbiralny vobraz amierykanskaj hłybinki. Hałoŭnaja hierainia — 45-hadovy detektyŭ palicyi Mejr Šyen (Kiejt Uinślet). Hod tamu jana nie zmahła rasśledavać źniknieńnie 17-hadovaj dziaŭčynki, za što atrymlivaje na arechi ad miascovaha nasielnictva i maci dziaŭčynki.
Niejak u Isttaŭnie zabivajuć 17-hadovuju maci-adzinočku, i Mejr biarecca za spravu, a paralelna starajecca znajści ščaście ŭ svaim žyćci. Paru hadoŭ tamu skončyŭ žyćcio samahubstvam jaje syn, jana imkniecca atrymać apieku nad jaho synam, bo jaje niaviestka niepuciovaja i schilnaja da narkotykaŭ. Cikavy vobraz dački Mejr — 17-hadovaj dziaŭčyny Šyvan, jakaja pakutliva robić vybar pamiž hramadskim i asabistym.
Zabojstvy ŭ adnym budynku (Only Murders in the Building)
Jak ža składana zrabić kłasny kamiedyjny sieryjał! Ale stvaralnikam historyi pra tajamničyja zabojstvy ŭ domie na Manchetanie heta ŭdałosia. Pa siužecie, u domie vypadkova znachodziać adno adnaho amatary kryminalnych padkastaŭ: pasiviełaja zorka niekali papularnaha kryminalnaha sieryjała, hienijalny ekscentryčny režysior i maładaja tajamničaja dziaŭčyna, jakaja ŭ hetym elitnym rajonie ŭsiaho tolki časovaja hościa. Hetaja rola, darečy, dastałasia Sielenie Homiez.
Kali ŭ ich domie ŭ centry Ńju-Jorka adbyvajecca sapraŭdnaje zabojstva, hetaja troica biarecca za rasśledavańnie. I za tym, jak jany viaduć spravu, možna nazirać biaskonca.
Vostryja bryli (Peaky Blinders)
Dziŭna, što hety sieryjał nie trapiŭ u našu minułuju padborku, bo jon adnaznačna pavinien być u śpisie najlepšych. Hałoŭnuju rolu hetaj hanhstarskaj sahi pra hrupoŭku cyhanskich bandytaŭ ź Birminhiema hraje niepaŭtorny Kilijan Miorfi. Historyja zasnavanaja na realnych padziejach, što samo pa sabie kaštoŭna.
U šaści siezonach my stanovimsia śviedkami zmahańnia za ŭpłyŭ, hrošy, rynki, my nazirajem niaprostyja siamiejnyja adnosiny, kachańnie i śmierć. Atmaśfiera sieryjała ŭnikalnaja. U kožnym vobrazie, kožnym kadry adčuvajecca vialiki hust i biezdakorny styl.
Supierhieroi i žachi
Uensdej (Wednesday)
Kali vy lubicie filmy pra Hary Potera, to hety sieryjał trapić vam u samaje serca. Varta hladzieć dziela kazačnaj atmaśfiery, nu i dziela taho samaha tanca, ad jakoha šaleŭ uvieś tyktok.
U hetym sieryjale ad Netflix raskazvajecca pra junuju čaraŭnicu ź siamiejki Adams, jakaja pryjechała ŭ akademiju dla dziaciej ź niezvyčajnymi talentami. Tam jaje čakaje nie tolki novaje siabroŭstva, ale i tajamnica, jakuju treba raskryć.
Padzieńnie doma Ašeraŭ (The Fall of the House of Usher) / Paŭnočnaja imša (Midnight Mass)
«Padzieńnie doma Ašeraŭ» i «Paŭnočnaja imša» — heta mini-sieryjały majstra kinažachaŭ Majka Fłenahana. Abiedźvie historyi natchnionyja hatyčnaj litaraturaj, u «Padzieńnia domu Ašeraŭ» całkam kankretnaja litaraturnaja pieršakrynica — tvory Edhara Ałana Po.
Jak heta mahło zdarycca? Što budzie dalej? Chto zastaniecca ŭ žyvych? Mistyčnaja atmaśfiera žachu trymaje ŭ napružańni da apošniaj sieryi. Niahledziačy na hetuju mistyku, stvaralniki sieryjałaŭ dajuć zrazumieć, što zło — vybar ludziej, a strašnyja pačvary — tolki ślapyja vykanaŭcy ich vybaru. Fłenahan ź sieryjała ŭ sieryjał amal nie źmianiaje akcioraŭ, tamu asobnaje zadavalnieńnie dastaŭlaje sačyć za majsterskim pieraŭvasableńniem lichadziejaŭ u śviatoš, a achviar u spakuśnikaŭ.
Kabiniet dzivaŭ Hiljerma del Tora (Guillermo del Toro's Cabinet of Curiosities)
Kali vy ŭžo zasumavali pa «Čornym lusterku», to hety sieryjał dla vas. Vosiem mistyčnych epizodaŭ žachaŭ ad Hiljerma del Tora prykoŭvajuć da ekrana tak, što niemahčyma adarvacca. U pracesie prahladu daviadziecca pieražyć usiu hamu pačućciaŭ i šmat razoŭ zadać niamoje pytańnie: što ja tolki što pabačyŭ? Hetyja hatyčnyja kazki, jak by vy ich ni acanili, raŭnadušnymi vas nie pakinuć. A toje, jak jany źniatyja, sama karcinka — heta sapraŭdnaje majsterstva i mastactva.
«Naša Niva» — bastyjon biełaruščyny
PADTRYMAĆ
Kamientary