Biełarus zakryŭ svoj biznes i ciapier adnaŭlaje śviran u byłym majontku Niezabytoŭskich
Małady čałaviek vykupiŭ byłuju haspadarčuju pabudovu ŭ vioscy Bajary Mastoŭskaha rajona. Kab realizavać prajekt, jamu daviałosia zakryć ułasnuju spravu, ukłaści ŭsie aščadžańni i pravodzić budaŭničyja pracy samastojna.
Vybar abjekta dla Paŭła ź Niaśviža byŭ abumoŭleny dźviuma pryčynami: dastupnaściu dla nabyćcia i adsutnaściu statusu historyka-kulturnaj kaštoŭnaści, najaŭnaść jakoha, na jaho dumku, patrabuje ŭzhadnieńnia kožnaha rašeńnia i šmatrazova pavialičvaje košt rekanstrukcyi. Jak piša partał NewGrodno.by, u vyniku jon nabyŭ śviran u vioscy Bajary Mastoŭskaha rajona Hrodzienskaj vobłaści.
«Uvohule, i z hetym budynkam było nie ŭsio hładka. Bo śviran znachodzicca za 170 kiłamietraŭ ad majho doma. To-bok kožnaja pajezdka da jaho — heta bolš za 300 kiłamietraŭ tudy-siudy», — zhadvaje Pavieł.
Prajekt padtrymaŭ baćka, prafiesijny budaŭnik. «A potym my vyrašyli: kali, jak nie ciapier, pasprabavać realizavać maru?!» — dadaje małady čałaviek.
Pracy pačalisia ŭ lutym 2025 hoda z rasčyščeńnia ścien ad paŭmietrovaha słoja ziamli i śmiećcia, a taksama adnaŭleńnia histaryčnych muroŭ.
«Jeździli kožnyja čatyry dni, jak tolki ŭ baćki vypadaŭ vychadny. Prajazdžać takija dystancyi i pry hetym jašče pracavać — heta nialohka…» — kaža ŭłaśnik.
Finansavyja ciažkaści i zakryćcio biznesu
Sumiaščać maštabnuju rekanstrukcyju sa štodzionnym biznesam akazałasia składana, što pryviało da vyharańnia. Vychadam stała kardynalnaja źmiena dziejnaści.
«Rašeńnie znajšłosia. Ja zakryŭ usio da djabła i zaniaŭsia tym, čym chacieŭ. Paličyŭ, što aščadžańniaŭ chopić na paŭtara hoda. Tamu całkam pahłybiŭsia ŭ pracu», — tłumačyć Pavieł.
Padčas rekanstrukcyi ŭźnikli niepradbačanyja techničnyja prablemy, jakija zapatrabavali značnych finansavych ulivańniaŭ. Z-za niedastatkovaj mahutnaści isnujučaj pavietranaj linii elektrapieradačy ŭłaśniku daviałosia za ŭłasnyja srodki nabyvać i mantavać transfarmatarnuju padstancyju, što pavialičyła vydatki na 10 tysiač dalaraŭ. Taksama ŭźnikli ciažkaści z pošukam krynicy pitnaj vady na ŭčastku.
Interjer bieź śpiecyjalistaŭ
Absalutnuju bolšaść unutranych rabot Pavieł vykanaŭ razam z baćkam samastojna. Śpiecyjalistaŭ najmali tolki dla ŭstanoŭki voknaŭ i zalivańnia čystavoj ściažki. U dyzajnie rabiŭsia akcent na maksimalnaje zachavańnie aŭtentyčnych elemientaŭ.
«Tamu vyrašyŭ rabić štości blizkaje da kłasiki, ale pry hetym nie pieratvarać dom u muziej. Hałoŭnym pryncypam u pradumvańni interjeru było žadańnie prajavić estetyku daŭniny. Pa dapamohu ŭ dyzajnie ni da kaho nie źviartaŭsia, a vyrašyŭ zrabić tak, jak baču sam», — adznačaje Pavieł. Dziela napaŭnieńnia interjera jon štodnia manitoryć sajty z abjavami ŭ pošukach vintažnych rečaŭ.
Uładalnik pryznaje, što prajekt nie źjaŭlajecca vyklučna kamiercyjnym i patrabavaŭ nieracyjanalnych z punktu hledžańnia chutkaha prybytku ŭkładańniaŭ.
«Heta historyja dakładna nie pra dachod: za tyja hrošy, što ja siudy ŭkłaŭ, moh by źbić try «karkaśniki» i zarablać. Ale nie! U pieršuju čarhu chacieŭ zrabić miesca dla dušy, dzie ja zmahu z zadavalnieńniem pravodzić čas. Plus było žadańnie, a chutčej navat mara, vyratavać choć adzin sa staradaŭnich budynkaŭ, što razburajucca ŭ hłybincy».
Na siońnia budynak byłoha śvirna hatovy da pryjomu haściej i zdačy ŭ arendu. Atrymanyja srodki Pavieł płanuje nakiravać na svoj nastupny doŭhaterminovy prajekt — adnaŭleńnie staradaŭniaha muravanaha młyna, jaki znachodzicca niepadalok.
-
Za adnu bazavuju pradajuć histaryčny brovar z majontka Śviackich. U tym ža majontku pracavaŭ i Janka Kupała
-
«Vajb Pieciarburha». Rasijski režysior pastaviŭ u Kupałaŭskim «Serca na dałoni» pa Šamiakinu — vodhuki palarnyja
-
Siońnia biełarusy ŭ Biełastoku i ŭ Varšavie paŭdzielničajuć u «Nočy kniharniaŭ»
Deputatka, jakaja rychtuje pryhažuń dla Łukašenki, vyjšła zamuž23
Kamientary
Mnie asabista prajekt padabajecca. Asabliva adznaču pravilnaść rašeńnia ab najaŭnaści piečki-kamina.
Nie padabajecca tolki mietałačarapica na dachu. Pavinna była być zvyčajnaja dachoŭka, chaj i camientna-piasčanaja Kieraminaŭskaja.