Padpolščyk, jaki padkłaŭ vybuchoŭku rasijskamu pałkoŭniku, praz Turcyju i Małdovu vyjechaŭ va Ukrainu
Padazravany ŭ padryvie rasijskaha vajskoŭca kala miesiaca sačyŭ za im, uładkavaŭšysia pracavać u hipiermarkiet pobač. Vybuchoŭku jon zamacavaŭ pad mašynaj nočču, a da vybuchu ŭžo vylecieŭ z Rasii, śćviardžaje «Fontanka».
«Fontanka» apublikavała padrabiaznaści padryvu aŭtamabila ŭ pieciarburhskich Šušarach.
Pavodle vydańnia, bombu zakłaŭ 31‑hadovy žychar Pieciarburha. Jon kala miesiaca naziraŭ za pałkoŭnikam.
Mužčyna ŭładkavaŭsia roznarabočym u hipiermarkiet «Lenta» na Kołpinskaj šašy. Jon naziraŭ, kali vajskoviec viartajecca dadomu, dzie pakidaje aŭtamabil i a katoraj vyjazdžaje na słužbu.
Pavodle krynicy vydańnia «Fontanka», samarobnuju vybuchovuju pryładu pierapravili ŭ Leninhradskuju vobłaść pavietranym šaram z boku krain Bałtyi. Paćvierdžańnia hetaj viersii niama.
Paśla pryziamleńnia niechta zabraŭ hruz i pierakłaŭ bombu ŭ inšy tajnik dla vykanaŭcy. Apošni, pavodle vydańnia, zamacavaŭ pryładu pad dniščam aŭtamabila kala pieršaj hadziny nočy. Užo a 2:43 jon vylecieŭ z Pułkava ŭ Stambuł. Samalot pryziamliŭsia a 6:05, paśla čaho padazravany nakiravaŭsia ŭ Kišynioŭ. Vybuch prahrymieŭ a siomaj ranicy.
Pra toje, chto zahinuŭ u vyniku vybuchu źjavilisia supiarečlivyja paviedamleńni. Vydańnie 78.ru napisała, što moh zahinuć hałoŭny šturman 6‑j armii VPS i SPA Rasii Dźmitryj Łabodzin, ale paźniej vydaliła hetuju infarmacyju.
Ukrainskija kanały nazvali jašče dva imiony mierkavanych zahinułych: namieśnika kamandujučaha 6‑j armijaj pa vajenna-palityčnaj pracy Andreja Chadykina i namieśnika kamandujučaha pa avijacyi Viktara Paźniakova.
Ciapier čytajuć
Advakat Alaksandr Danilevič: Mianie adviali ŭ kletku na KPP i začytali ŭkaz dla słužbovaha karystańnia pra pamiłavańnie pa prośbie Mižnarodnaha alimpijskaha kamiteta1010
Kamientary