Biełarusy načami stajać u čarzie, kab uładkavacca na skład Wildberries u «Vialikim kamieni» z zarobkam ad 1500 rubloŭ
Pryjechała a dziaviataj ranicy — była 309‑j u čarzie. Achvotnyja pracavać na składzie ŭ «Vialikim kamieni» raskazvajuć u Threads, jak sprabujuć aformicca pa niekalki dzion, zaŭvažyŭ Reform.news.
Achvotnyja ŭładkavacca na skład Wildberries u industryjalnym parku «Vialiki kamień» pad Minskam zajmajuć čarhu nočču i jeździać tudy pa niekalki dzion zapar. Aŭtarka adnaho z pastoŭ pryjechała na afarmleńnie a dziaviataj ranicy i była 309‑j u čarzie. Pavodle jaje słoŭ, ludzi sprabujuć trapić unutr pa dva-try dni, a tyja, chto zapisvajecca apoŭnačy, atrymlivajuć numary blizu 80-ha.
Inšy kamientatar piša, što a 5:53 na rehistracyi ŭžo było 57 čałaviek, choć afarmleńnie pačynajecca a dziaviataj. Jašče dva tydni tamu, miarkujučy z kamientaroŭ, uładkavacca možna było za hadzinu.
Skład, pra jaki idzie havorka, zapuścili 25 maja hetaha hoda — jon pracuje amal siem miesiacaŭ, ale ažyjataž vakoł pracaŭładkavańnia ŭźnik mienavita ciapier. Zarobak zaležyć ad vypracoŭki, i ŭ vakansii heta adkryta paznačana: ad 1500 da 6000 rubloŭ na miesiac.
Apłata ździelnaja: za kožny «pik» (adnu apieracyju z adzinkaj tavaru) płaciać fiksavanuju staŭku. Naprykład, rabotnik skanuje reč terminałam i kładzie jaje ŭ jačejku abo skrynku ci dastaje dla vykanańnia zamovy. Pry hetym, pavodle kamientataraŭ, apłata za «pik» apošnim časam źniziłasia — mahčyma, praź niaspynny patok achvotnych pracavać.
Pavodle źviestak vydańnia, na stažyroŭcy ludzi atrymlivajuć kala 20 rubloŭ za paŭtary hadziny pracy. Pry vaśmihadzinnym pracoŭnym dni i piacidzionnym pracoŭnym tydni heta prykładna 2250 rubloŭ na miesiac. Kamientatary paćviardžajuć: navičkam na składzie WB załatyja hory nie śvieciać.
«Karaciej, my dniami nočču pryjechali, zapisalisia 25‑mi ŭ čarhu. Pajechali spać. Potym pryjechali ranicaj i za dźvie hadziny ŭładkavalisia. Paśla jašče navat paśpieli papracavać hadziny try. Ale ŭ vyniku za hetyja try hadziny my zarabili pa 45 rubloŭ čystymi na ruki na čałavieka», — piša elektros.pro u kamientarach da pasta.
U toj ža čas kamientatary pišuć, što pry peŭnym sprycie možna zarabić i 250 rubloŭ za źmienu praciahłaściu 9—10 hadzin. Heta 25—28 rubloŭ za hadzinu: pry takim ža hrafiku z vaśmihadzinnym pracoŭnym dniom atrymałasia b 4200—4700 rubloŭ na miesiac, a kali pracavać pa 9—10 hadzin piać dzion na tydzień — kala 5250 rubloŭ.
Vierahodna, ludziej nabirajuć z zapasam, raźličvajučy, što častka adsiejecca, i zarobki praz heta pastupova źnižajucca. Aŭtarka pasta paćviardžaje: niekatoryja jaje znajomyja aformilisia, vyjšli na pracu adzin raz i bolš nie viarnulisia.
I ŭsio ž patok achvotnych nie źmianšajecca.
«Praca nie zusim lohkaja, ale ja dakładna viedaju — u Minsku takoha zarobku ciapier nie znajści», — piša adna z rabotnic składa.
Jašče adzin arhumient — svabodny hrafik, jaki mała chto hatovy prapanavać.
Ciapier čytajuć
Advakat Alaksandr Danilevič: Mianie adviali ŭ kletku na KPP i začytali ŭkaz dla słužbovaha karystańnia pra pamiłavańnie pa prośbie Mižnarodnaha alimpijskaha kamiteta1010
Kamientary