Moładź choča być budaŭnikami, jurystami i fizrukami

Mienavita takija śpiecyjalnaści karystajucca najbolšaj papularnaściu ŭ sioletnich abituryjentaŭ.

U Biełarusi ŭ samym razhary ŭstupnaja kampanija ŭ vyšejšyja navučalnyja ŭstanovy. U jakija VNU druhoha patoku najbolš imknucca abituryjenty?

U liderach — BDU i BNTU. Pa stanie na 12 hadzin 20 lipienia ŭ kožny z univiersitetaŭ padadziena ŭžo bolš za paŭtary tysiačy zajaŭ.

Najbolšym popytam u BDU pakul karystajucca histaryčny fakultet («Dakumientaznaŭstva»), mižnarodnych adnosin, prykładnoj matematyki i infarmatyki («Aktuarnaja matematyka, infarmatyka, kampjuternaja biaśpieka»), jurydyčny («Pravaznaŭstva», «Ekanamičnaje prava»). U BNTU — heta aŭtatraktarny («Aŭtasiervis») i budaŭničy fakultety («Pramysłovaje i hramadzianskaje budaŭnictva»).

Značna adstajuć BDUIR i BDTU. U BDUIR padali 262 zajavy. Heta pry ahulnym nabory ŭ 1025 čałaviek. Jašče nichto nie vykazaŭ žadańnia pastupać na śpiecyjalnaści «Mietrałahičnaje zabieśpiačeńnie infarmacyjnych sistem i sietak» (f-t telekamunikacyj), «Kvantavyja infarmacyjnyja sistemy» (f-t radyjotechniki i elektroniki). U technałahičnym univiersitecie pry pryjomie ŭ 2980 studentaŭ, kolkaść achvočych tut navučacca pakul składaje 551.

Ź jakimi prafiesijami źviazvajuć žyćcio ŭ rehijonach. Tut

pieravaha addajecca śpiecyjalnaściam «pravaznaŭstva», «fizičnaja kultura».

U Baranavickim dziaržaŭnym univiersitety najbolšaja kolkaść abituryjentaŭ pastupaje na śpiecyjalnaści fakulteta ekanomiki i prava. U Paleskim dziaržaŭnym univiersitecie (Pinsk) — «Bankaŭskaja sprava, ekanomika, finansy, buchulik, markietynh». HDU imia Janki Kupały — «Techničnaja ekspłuatacyja aŭtamabilaŭ», «Abstalavańnie i technałohii vysokaefiektyŭnych pracesaŭ apracoŭki materyjałaŭ», «Pramysłovaje i hramadzianskaje budaŭnictva». VDU imia P. Mašerava — «Pravaznaŭstva», «Fizičnaja kultura». Homielski dziaržaŭny univiersitet imia Francyska Skaryny — «Hieałohija», «Pravaznaŭstva», Mahiloŭski dziaržaŭny univiersitet imia A. Kulašova — «Fizičnaja kultura», «Pravaznaŭstva».

Va ŭsich VNU krainy jašče nie śpiašajucca padavać dakumienty na płatnuju i zavočnuju formy navučańnia. Jano i zrazumieła. Pry pastupleńni na biudžet mała chto zadumvajecca nad dalejšym raźmierkavańniem. Hałoŭnaja zadača — atrymać bilet studenta.

Pryjom na śpiecyjalnaści dzionnaj biudžetnaj formy navučańnia praciahvajecca da 25 lipienia (na vajennyja fakultety da 23). Na zavočnuju biudžetnuju formu — da 2 žniŭnia, a na dzionnaje i zavočnaje na płatnaj asnovie — da 4.

Zaličeńnie budzie prachodzić z 1 pa 6 žniŭnia.

Nahadajem, što zaličeńnie ŭ vyšejšyja navučalnyja ŭstanovy pieršaha patoku (siłavyja VNU, Akademija muzyki, Akademija mastactvaŭ, BDU kultury i mastactvaŭ) adbudziecca z 24 pa 28 lipienia.

Sioleta 55 VNU Biełarusi płanujuć pryniać amal 103 tysiačy abituryjentaŭ na ŭsie formy navučańnia.

I tolki kožnaje treciaje miesca budzie biudžetnym.

• 0
• 0
• 0
• 0
• 0
• 0
• 0
• 0