«Darahi, schilajusia pierad tvajoj mužnaściu i achviarnaściu [haładoŭka], ale ty vybraŭ nie toj šlach». Vielikodny zvarot a. Alaksandra Nadsana.
- Chrystos vaskros!… usiudy radaść,
Usio hladzić śmialej, śviatlej;
Vialiki Mučanik, zdajecca,
Abniaŭ usich łaskaju svajej.
Hetyja słovy Janki Kupały vydatna addajuć radaść vialikaha śviata, sutnaść jakoha, pavodle vialikodnych carkoŭnych śpievaŭ, u tym, što, padobna Majsieju, jaki vyvieŭ abrany narod praz Čyrvonaje Mora ź jahipieckaj niavoli da svabody, Hospad Isus Chrystos pieravioŭ usich nas «ad śmierci da žyćcia i ad ziamli na nieba». Takim čynam Vialikdzień — heta adnaŭleńnie ŭsiaho stvareńnia u Bohu praź Isusa Chrysta. Nie darma śviatyja ajcy nazyvali jaho aktam novaha tvareńnia.
Radaść vialikaha śviata nie pavinna, adnak, dać nam zabyć, što Vielikodnuju Niadzielu apiaredžvała Vialikaja Piatnica, kali Hospad Isus Chrystos pavis na kryžy, falšyva abvinavačany tymi, što ŭvažali siabie duchoŭnymi pravadyrami narodu, i addany na śmierć sudździoju, kab dahadzić abvinavaŭcam, choć sam nie znajšoŭ ŭ Im nijakaj viny. Ni sudździa, ni abvinavaŭcy nie padazravali, što zasudzili na śmierć Taho, kaho mahiła nie mahła ŭtrymać i chto skazaŭ pra siabie: «Ja — daroha, i praŭda, i žyćcio».
Kryžovaja śmierć Chrysta daje nam šmat da razvahi nad śmiarotnym pakarańniem. Žyćcio — heta najvialikšy dar Božy, i tolki Boh moža zabrać jaho u svoj čas.Heta nie aznačaje, što toj, chto zrabiŭ złačynstva, nie pavinien być pakaranym. Ale pakarańnie pavinna być spałučana ź miłasernaściu, kab dać mahčymaść asudžanamu ŭśviedamić svajo złačynstva i pakajacca. Važna taksama mieć na ŭvazie toje, što pakarańnie śmierciu u vypadku pamyłki nielha napravić. Chrystos skazaŭ «Nie chaču śmierci hrešnika, ale kab jon pakajaŭsia i mieŭ žyćcio viečnaje», a svajoj śmierciu na kryžy Jon asudziŭ śmiarotnaje pakarańnie.
Žyćcio — heta dar Božy, i tamu čałaviek nie moža adabrać jaho nia tolki inšamu, ale i samomu sabie, u tym liku praz haładoŭku.Zvyčajna na hetaje apošniaje navažvajucca ludzi mocnaha charaktaru, jakim byli pierakrytyja ŭsie inšyja šlachi dla asiahnieńnia spraviadlivaści. Chaciełasia b skazać takim ludziam: «Darahi, schilajusia pierad tvajoj mužnaściu i achviarnaściu,
ale ty vybraŭ nia toj šlach. Tabie treba žyć na radaść tvaim blizkim i na karyść toj vialikaj idei, jakoj ty addany. I Boh tabie dapamoža."
Siońnia, u hety śvietły i radasny dzień budziem prasić Uvaskrosłaha Chrysta, kab Jon daŭ palohku i siłu ducha tym, chto cierpić niespraviadliva, i suciašeńnie siemjam tych, jakija paciarpieli stratu svaich darahich, a ŭsim — nadzieju lepšaj doli dla nas i našaj baćkaŭščyny u hetym žyćci i viečnaj radaści razam ź Im u budučym.
a. Alaksandar Nadsan, apostalski vizitatar dla biełarusaŭ zamiežža, Vialikdzień 2012
Ciapier čytajuć
Byłoha milicyjaniera asudzili za žadańnie vajavać u Pałku Kalinoŭskaha. Pahražała da 15 hadoŭ kałonii3
Kamientary