U hetyja miesiacy palityka dy vojny niby adychodziać na druhi plan. Pamiatajecie, jak padčas «Euro-2004» i atenskaj Alimpijady ŭsie čakali teraktaŭ? Ničoha nie adbyłosia. Ci to spracavali biesprecedentnyja zachady biaśpieki, ci šachidy — takija ž spartovyja zaŭziatary, jak i zvyčajnyja ludzi, i, zamiest taho kab švendacca aby-dzie z vybuchoŭkaj, družna pasieli pierad televizarami.
Hučnych palityčnych padziej taksama ŭ červieni i žniŭni 2004 hodu nie prypomnicca. Tamu ja rekamendavaŭ by Centravybarkamu pravieści nastupnyja vybary ŭ červieni 2006 hodu, kali projdzie futbolny mundyjal. Jakaja palityka, jakija akcyi, kali ŭžyvuju pakazvajuć chakiej Kanada—Čechija ci futboł Niamieččyna—Arhientyna!
2004 hod prynios biełaruskamu sportu jak radaści, tak i rasčaravańni. Hałoŭnaj padziejaj staŭ załaty medal Julii Nieściarenki na atenskaj stometroŭcy. Pośpiech suśvietnaha maštabu, bo ŭpieršyniu z 1980 hodu prestyžnuju dystancyju vyjhrała — vybačajusia za niepalitkarektnaść — biełaskuraja žančyna. Darečy, zdymak pieramožnaha finišu žycharki Bieraścia ahienctva Reuters nazvała najlepšym u minułym hodzie.
Na Juliju musiać malicca i biełaruskija spartovyja čynoŭniki. Kab nie jana, palacieli b ich hałovy za nievykanańnie planu pa medalach («žnivo» skłała tolki 60 adsotkaŭ ad planu).
Darečy, pra plany. U Internecie hulaje anekdot, što ministar sportu i turyzmu Biełarusi saśniŭ kašmar: pierad im pastaŭlenaja zadača zavajavać na zimovaj Alimpijadzie ŭ Turynie taksama 25 medaloŭ. Dla tych, chto nie zrazumieŭ: usiaho padčas Biełaj Alimpijady budzie razyhrana 84 kamplekty medaloŭ, a ŭ Sołt-Łejk-Syty biełarusy naahuł zadavolilisia tolki adnoj «bronzaj».
Aleh Rajaviec
«Dyk dadomu zabiary ałkaša abascanaha i vychodžvaj». Małady zahadčyk adździaleńnia balnicy nie strymlivaje siabie ŭ vyrazach u sacsietkach21
Kamientary