Трагедыя здарылася ў Маладзечанскім раёне.
Сем гадоў — максімальнае пакаранне, прадугледжанае Крымінальным кодэксам за такое злачынства. Генадзь таксама на пяць гадоў пазбаўлены права кіраваць любымі транспартнымі сродкамі. Акрамя гэтага, суд палічыў: Генадзь Бандарык павінен адбываць тэрмін зняволення ў калоніі ва ўмовах агульнага рэжыму, нягледзячы на тое, што звычайна за злачынствы, здзейсненыя па неасцярожнасці, прысуджаецца калонія ва ўмовах пасялення. Прыгавор пакуль не ўступіў у законную сілу, і асуджаны мае права яго абскардзіць у Мінскі абласны суд
Нагадаем: 27 лістапада 2006 года каля 14.45 аўтамабіль МАЗ‑5551 на вялікай хуткасці рухаўся ў Цюрлях па вуліцы Савецкай у бок Маладзечна. Ля аўтобуснага прыпынку машыну раптам павяло ўправа. МАЗ пераехаў бардзюр і ўрэзаўся ў павільён прыпынку. Загінулі тры жанчыны, дзве з іх — родныя сёстры. Паводле заключэння судмедэксперта, смерць наступіла імгненна ад масавых траўматычных пашкоджанняў.
Пасля здарэння работнікі дзяржаўтаінспекцыі знайшлі ў кабіне грузавіка паўбутэлькі віна. Ад вадзіцеля быў чутны пах спіртнога. Ён патлумачыў, што выпіў 200 грамаў віна ўжо пасля аварыі, бо знаходзіўся ў шокавым стане. Да здарэння быццам бы быў цвярозы.
На судовым пасяджэнні Генадзь Бандарык сцвярджаў тое самае. Ён не прызнаў сваю віну і патлумачыў, што каля 300 грамаў гарэлкі выпіў напярэдадні вечарам. Раніцай 27 лістапада рамантаваў машыну і спіртнога не ўжываў. Пасля абеду выехаў у вёску Маліноўшчына на спіртзавод.
У Цюрлях, недалёка ад аўтобуснага прыпынку, у машыны лопнула задняе кола і яе кінула ўправа. Генадзь кажа, што ўдарыўся грудзьмі аб руль і яму стала дрэнна. Калі прыйшоў у прытомнасць, у пяці метрах перад машынай убачыў сілуэты людзей. Па словах абвінавачанага, ён нічога не мог зрабіць, затармазіць не паспеў і наехаў на павільён прыпынку.
Паказанні вадзіцеля МАЗа абвяргае заключэнне эксперта, згодна з якім, разгерметызацыя шын правага пярэдняга і правага задняга колаў узнікла ў выніку наезду грузавіка на павільён прыпынку. Перад трагедыяй машына была спраўная. Па выніках медыцынскага агляду, які быў праведзены адразу пасля здарэння, у крыві вадзіцеля ўтрымлівалася амаль два з паловай працэнты алкаголю.
Гэтыя факты, а таксама паказанні сведкаў далі суду падставу зрабіць выснову: Генадзь Бандарык у стане алкагольнага ап’янення падчас руху перавысіў хуткасць, страціў кантроль над машынай, не справіўся з кіраваннем і здзейсніў аварыю. Яго дзеянні трэба кваліфікаваць як «парушэнне правілаў дарожнага руху, што пацягнула за сабой смерць трох чалавек».
Сваякі загінуўшых жанчын папрасілі суд спагнаць з сельгаскааператыва «Хажова‑Агра», якому належыць МАЗ, кампенсацыю маральнай шкоды на агульную суму ў 690 мільёнаў рублёў. Суд прыняў рашэнне спагнаць з «Хажова‑Агра» кампенсацыю маральнай шкоды сваякам загінуўшых на агульную суму ў 45 мільёнаў рублёў.
Цяпер чытаюць
Пяць дзён, 60 удзельнікаў, саўна, більярд і крыкі адно на аднаго. Расказваем, як прайшла закрытая «гульня Мацкевіча»54
Каментары