Беларусь на другім месцы ў свеце па спажыванні гарэлкі на душу насельніцтва
Беларусы займаюць другое месца ў Еўропе па колькасці зняволеных у турмах у прапорцыі да насельніцтва, другое месца ў свеце па разводах і вось — другое таксама па спажыванні гарэлкі. Пра гэта сведчаць дадзеныя рэйтынгу, складзенага на аснове звестак брытанскай кампаніі International Wine & Spirit.
Паводле даследавання, на аднаго жыхара Беларусі ў год прыпадае больш за 11 літраў гарэлкі.
Першае месца ў дадзеным рэйтынгу належыць Расіі (13,9 літра), другое — Беларусі (11,3), трэцяе — Украіне (7,7), чацвёртае — Польшчы (7,0), пятае — Казахстану (5,9).
Усяго ж жыхары Зямлі ў 2012 годзе выпілі 4,44 млрд літраў гарэлкі.
Акрамя таго, зямляне выпілі 1,47 млрд літраў рому (лідар Куба — 4,9 літра на чалавека), 0,86 млрд літраў скотчу і віскі (лідар Францыя — 1,9 літра на чалавека), 0,44 млрд літраў джыну (лідар Філіпіны — 1,4 літра) і 0,23 млрд літраў тэкілы (лідар Мексіка — 0,63 літра).
Цікава, што і па п’янстве, і па разводах, і па турэмнасці Беларусь дзеліць п’едэстал з Расіяй. Словы пра «рускіх са знакам якасці» ў такім кантэксце набываюць асаблівае гучанне.
Каментары